雖然呢幾日係大暑，熱到邊度都唔想去，但係諗起好都有一排無去過廣州食野同行街，趁住今個禮拜唔再打風，就同大老爺上去行翻轉先。
今年年頭摸過入黎呢間開無耐o既「麒勝」，當時啱啱係過年時候，佢d生意好到不得了，我地搵唔倒位所以未正式幫趁過，今次經過又入黎試下先。時間都仲未夠六點，已經有好多枱客入座
我地今次叫左呢個節瓜煲淋豬肚，豬肚同節瓜都好啱味，唔會太鹹，豬肚又夠淋，水準唔錯
竹笙海參炆鴨掌整得唔錯，真材實料味道又好
沙窩魚頭賣相好兼夾味道好，份量又夠，響香港俾多一半錢都食唔倒呢個水準。呢幾張相偏晒黃色係因為大老爺影完日蝕之後唔記得校翻個相機，所以呢幾張全部走晒樣！
到佢發覺d相唔妥再影過果時，枱面已經變左咁樣咯！
淨係睇下兩個骨碟都知我地幾有食力啦！
百一銀埋單，算係相當對辦，下次可以再黎食過！呢度仲有呢一味「龍虱」，我細個果時見過人地食，聽講話好好味o既喎！
第朝瞓醒，去左往常我地去過o既「水蛇村」飲早茶，但係今次好失望，除左冷氣嚴重唔夠之外，點心水準亦都唔掂，以後唔洗再黎！
飲完茶行左一陣，熱到出油咁滯，好早就溜左入黎呢間三唔識七o既酒樓食下晝，但係佢d小菜得一個字：鹹！
炒菜心咁簡單，雖然d菜好靚，但都係：鹹！
芥菜燒骨煲：鹹！
呢餐若果厨師落手輕d都食得下o既，但係就係衰在：鹹！
天氣好熱，響街度再行實會中暑，所以同大老爺商量過，都係去行商場穩陣d，於是就向萬菱廣場進發，途經一德路海味街，少不免又要光顧吓呢個靚姐，同佢買過幾次冬菇仔，的確係又平又靚！抵同佢推廣下o既！
佢個檔口其他貨色都唔錯
買完冬菇，順便行過對面百回味茶餐廳飲翻杯凍啡爽下先
今次至留意倒呢度d燈飾好有六十年代feel
呢幾盞又幾盞鬼丫！
佢杯凍啡幾夠味，大熱天時整翻杯的確消得下暑
加埋呢件練奶西多，一個餐都係17蚊
大老爺另外要左呢個冰凍黑糯米，佢食落話又唔係特別好甜，都算照顧左新一派人o既口味，我試左一啖，又係幾好食喎
嘆完下午茶，繼續行去萬菱果便，途經文具商場，又走入去買左呢個kitty背囊仔俾契女做二年班新書包，開價40，講完價30成交
卒之黎到目的地萬菱廣場，今日禮拜六比較多人！
呢度有成七八層，每層過百間小商鋪，新奇款式又多，真係攪到你對眼好唔得閒
呢d係筆黎喎！
公仔又幾得意！
Kitty小飾物更加四圍都係
水晶花都有好多款
行完萬菱，對腳都已經有d攰，但係遇啱放工時間又截唔倒的士，所以同大老爺又行多一段路，沿住d民居行返去酒店。經過呢度有人用個膠盤賣蝎子，幾毫子一隻，話煲湯好有益o既喎！唔知係咪呢？
行行下又經過呢個唔知咩野古蹟
佢個塔又幾高喎！
夜晚去翻酒店附近o既鳳厨食晚飯，佢生意越黎越好，證明只要係有誠意，就算鋪頭開響樓上，生意都會一定做得住
o既！
今晚我地黎到已經係八點過外，d人客仲係好多，我地只可以響電梯口搵倒張枱仔，拿拿聲點翻碗雙皮奶開下胃先，跟住點左幾樣我地食過o既小菜，雖然見倒有新菜式，但係咁耐無黎幫趁，都係記掛住d老朋友多d，下次至試新菜啦！
首先上黎o既係呢個23蚊o既老友--煎釀鯪魚
佢一如既住做工精細，成條魚o既魚皮保留得好好，魚肉唔鹹，加個芡汁令條魚無咁乾，的確係越識得佢耐越有味道！水準雖然未及得黃媽媽果條得獎釀鯪魚，但係人地賣貴成倍，佢呢條都算係好正架罅！
再上黎呢位老友係魚腐扒菜膽
呢度d魚腐做得好精緻，個汁又出色，我地專登改左個小唐菜底做生菜底，咁就更加好味嘞！
再黎o既黎大老爺o既至愛—菜遠炒魚片
呢d大魚片本來好多幼骨，但係師傅用順刀切片，d骨係成條成條咁唔會碎開一截截，所以好容易食，但係都要小心，因為佢太好味，我都差d哽親！
我地卒之都係食唔得晒，要將部分魚腐同菜心打包攞走。呢三樣咁精彩o既小菜加一碗雙皮奶，又食又拎，埋單都係八十零蚊，抵食加好食，唔怪得我地對佢念念不忘o既！下次再見啦！
