食住高鐵上武漢(12)(完)
今日係第五日響武漢咯，雖然無去過d乜野特別o既風景名勝，但總算響呢度食左好多餐，其中有好幾餐都算係水準唔錯o既，今日臨走都食多一餐王府井酒店，印象相當唔錯。
下晝就坐高鐵走咯。兩個人黎玩左五六日，總共洗左5千零蚊，若莫等於我地原先打算去o既新加坡兩套機票錢，都算相當經濟。武漢，我會再黎食過o既，再見。
今朝起身，執好野預備走咯，天氣就冷左幾度，落樓下食碗牛雜面暖下個胃先
中午退左房，就行過黎呢間門面幾靚o既王府井酒店食翻餐至走
我好鍾意呢度d杯，好有型架！
個餐牌幾大個！
呢度d菜式又唔錯添，我地今餐點左呢幾樣野
紅豆豬尾唔覺得肥，d紅豆又幾好食架
呢個叫做小魚小蝦，全部撈粉炸脆上碟，好香口，我地食唔晒包埋上火車食
炒菜苗好好味
仲有半打生煎包，煎得面軟底脆，水準唔錯，但係我同老爺都食得好飽，要留翻兩個上車食
呢餐咁豐富o既午餐，都係花左80蚊人仔，下次再黎武漢一定會再黎
臨走同呢個好好笑容o既知客妹妹影張相先
坐巴士話咁快就出到黎武漢火車站，見有個廣告好熟面口，原來係介紹我地住過三晚o既華坤賓館o既
老爺著晒三四件衫上身，可見今日真係冷左咯
我地雖然已經買左票，但係都黎八卦下呢d自助售票機先
武廣高鐵班次頻密，每個鐘有三四班
武漢火車站入面都幾靚架
車站好齊整，比起舊式火車站進步左好多，有機場feel
呢度好新淨，月台好多都仲未啟用。我地坐果架高鐵入站嘞
黎果時兩袋，走o既時候就變左四袋
返去呢隻票同黎果張唔同色，唔同色o既票連入口都要分開入
上車罅！
今次回程呢架係快車，只停長沙一站，所以只需3:15小時，比黎o既時間快左半個鐘有多。速度最快見倒348，都唔為意有無超過350呢！響車上仲有一段小插曲，隔籬位坐左個五六歲o既大眼妹妹，奀皮到不得了，一下唔順佢意，就可以瞓響地下扭計，佢阿媽都無晒佢收，我得閒同佢講下玩下，又俾d野佢食，點知佢竟然同我起花名喎，佢叫我做：「大眼金魚」！佢自己對眼都唔細丫，唔知係咪俾人咁叫佢呢
