陪老爺巡視華東(14b)- (完)

第十四日 ： 南京 (靈谷寺)

行完雨花台公園，臨別秋波下晝我地去埋靈谷寺，但係黎到寺門口都已經接近關門時間，所以無買票入去，只係響門口影左d相，坐左一陣就出返市區搵飯食。

響南京最後一日，大老爺又諗起野馬飯店d獅子頭，咁又去食多一餐至返香港啦。呢間餐館水準的確唔錯，我地響南京總共幫趁左三次都食唔厭，算係破晒往例架嘞！

華東之旅黎到呢度，成個行程已經全部圓滿結束，由杭州、上海、揚州一直玩到南京，十幾日黎都玩得好開心。要特別多謝響上海招呼左我地幾日o既朋友，全賴有佢大老爺對上海o既印象至好d咋！

 

我地黎到靈谷寺都已經接近關寺時間，所以就無買票入場

 

但係門口景色都仲算唔錯

 

一湖倒影幾得人鍾意

 

仲有些少紅葉添

 

 

響湖側邊仲有呢d電動車仔出租

 

連小朋友都有得玩

 

每個鐘15蚊算係好平架嘞

 

夜晚第三度黎幫趁野馬，都係因為對佢d出品有信心，但係呢個豬手就乾身左些少

 

大老爺o既至愛獅子頭水準似然咁標青

 

唔知點解佢食極都唔厭o既

 

入面呢d豆付、魚肉、肉碎配搭得均勻可能係原因之一啦

 

呢個生菜包我地又再翻點，依然係讚不絕口

 

呢次o既饀料係西芹炒鴨丁，仍然相當惹味

 

青菜都唔錯

 

夢夢見倒大閘蟹，對眼就發晒光

 

華東最後一擊當然唔放過佢啦

 

有咁多野食，呢個大餅就顯得有d多餘嘞

 

野馬飯店，下次南京再見啦！

陪老爺巡視華東(14a)

第十四日 ： 南京 (雨花台、烈士紀念館)

響鎮江返左南京，玩多一日就要走咯，南京先幾日黎過，有d地方都去玩過，今日就去雨花台公園行下，呢度原來仲有一個烈土紀念館，係介紹一班響國共相爭期間為理想而捐軀人士事蹟o既。

 

呢朝一早大老爺又一個人去左行晨運，見佢影返黎d相都行左唔少地方喎，今朝佢又去探徐悲鴻嘞

 

仲探埋傅抱石添！原來南京都有唔少著名藝術家響度住過喎

 

我就鍾意呢度多d，中英文名都咁靚，不過唔知d野好唔好食呢，最衰又無機會等佢開門入去試下

 

等大老爺自己行完返黎，我地就一齊去左雨花台公園

呢度d小攤檔有好多五顏六色o既雨花石賣，不過就好假吓囉！

 

我地坐電瓶車仔黎到呢度，見個建築物咁宏偉，又落車入去行下先

 

呢個紀念碑咪同廣州黃花崗果個差唔多…

 

原來真係喎，連個館都係記念革命烈士o既

 

南京地區響上世紀初期係國共兩派勢力正面交鋒o既地方，唔同政見兩方打生打死，雙方都有唔少年青有為o既英雄兒女各為自己o既理想犠牲性命

 

宜家成王敗寇，打贏果便o既捐軀者就有幸成為烈士，可以建館安身，英雄事蹟可以冠冕堂皇咁公開俾人憑弔歌頌一番，但係打輸果便果d又算唔算係烈士呢？

 

呢d咁嚴肅o既歷史問題，講起黎仲苦過黃蓮，都係唔好理咁多嘞，行完紀念館，拿拿聲搵間食店開餐好過。搵啱呢間門面唔錯，但係響呢度我地都要食黃蓮喎…

 

原來呢度好特別咁用呢d蓮子心黎沖茶俾我地飲，但係飲落又唔覺話苦喎，係甘甘地，味道唔錯！

 

呢間食店除左蓮心茶特別之外，食品仲幾有驚喜添，呢兩個涼菜賣相一流

 

材料唔係咩高貴貨色，只不過係雞蛋同䈑笋…

 

蒜蓉同青瓜…

 

但係花d心機整左上碟，賣相就相當討好，響大陸一般中價食肆能夠做倒咁o既水準相當難得！

 

佢地除左冷盤精致之外，熱菜亦都相當可人，呢個栗子炆雞就相當惹味

 

雪菜蚊魚仔亦都非常之好

 

我唔記得呢d魚仔叫咩名，但係食落就好似白飯魚咁，軟軟滑滑，同d配菜好夾

 

佢得一條中骨，而且唔硬，可以連骨都趙埋

 

呢個炆羅白夠晒火候，夠淋又入味

 

加埋呢碟唔算太肥膩o既炒飲，呢餐食得非常滿足！

 

最緊要仲係埋單唔算貴，百零蚊找數算係相當抵食

陪老爺巡視華東(13b)

第十三日 ： 鎮江 (金山寺、焦山)

   

響焦山山頂行返落黎，睇完炮台之後，就差唔多黎到碼頭要坐船仔走咯，但係臨走之前大老爺話仲有一度一定要去睇o既，就係響書法界好出名o既焦山「印心石屋」喎，書法我無咩興趣，但係大老爺話要去，咁就跟佢行下啦。

黎到之後，發覺呢度其實並唔係咩「石屋」，原來係一個展館，裏面展覽左一d石碑，老爺對其中一間「瘞鶴銘」展館特別有興趣，一個人響入便行左好耐，仲影左好多相添，我就唔識係乜嘞。

 

印心石屋簡介

 

道光年御書，即係清朝皇帝寫架啦

 

響展區裏面，仲另另舍舍有一個獨立展館，大老爺一見呢間野，就儍左一樣，叫我同夢夢自己四圍行行下先，佢自己一個人入左去成半個鐘至出黎

 

佢響入面影左好多相，都係五舊爛石頭黎啫，我唔識係乜，就放幾張出黎俾大家睇下，睇過有無人識啦

 

大老爺話呢d石頭原本d字係咁o既喎：

 

   　　　　　　　　　金山本《瘗鹤铭》原文

鹤寿不知其纪也，壬辰岁得于华亭，甲午岁化于朱方。天其未遂，吾翔寥廓耶？奚夺余仙鹤之遽也。乃裹以玄黄之巾，藏乎兹山之下，仙家无隐晦之志，我等故立石旌事篆铭不朽词曰：相此胎禽，浮丘之真，山阴降迹，华表留声。西竹法理，幸丹岁辰。真唯仿佛，事亦微冥。鸣语化解，仙鹤去莘，左取曹国，右割荆门，后荡洪流，前固重局，余欲无言，尔也何明？宜直示之，惟将进宁，爰集真侣，瘗尔作铭。

 

仲話係「大字之祖」喎

 

 

 

 

 

 

 

等老爺睇完爛石頭，我地就坐船仔渡過長江返歸嘞，望返轉頭，焦山個塔又係幾英噃！

 

鎮江風景仲有唔少，但係我地都要收拾心情，預備坐車返南京走人咯，臨走之前，摸左入去呢個鎮江婆婆間食店仔食多一餐鎮江菜至去坐車

 

因為初初搵唔倒地方食野，大老爺一入到黎呢度，就一口氣叫左四五樣菜，後來想話取消呢個水晶肉，但係婆婆好快手，都未開聲話唔要啫，呢個水晶肉已經可以上枱咯

 

其餘仲有：炒生菜

 

獅子頭

 

黃豆猪手

 

草菇湯。食完呢餐我地就坐車返南京玩多一日，等坐飛機返深圳