食住高鐵上武漢(6)
返到賓館住落左，老爺又嗌肚餓咯，呢度附近無咩選擇，就響樓下附近呢間秀江南私房菜食一餐先。
私房菜宜家興到黎內地嘞
我地見菜牌又有呢味蛋黃南瓜，呢度係切條o既，食落仲好味過尋晚切粒果d喎
上湯浸娃娃菜好啱味
蛋黃炒白菜仔，白菜食晒，蛋黃無郁過
成晚最失敗就係叫左呢個粟米汁
要成38蚊一喳，我地都飲唔倒一半
武昌魚即係我地廣東人叫o既邊魚，出晒名好魚味但係多骨，要黎蒸係唔錯o既，但係多骨o既魚仲要切片蒸就唔多ok嘞，d骨碎上加碎，唔小心食好易哽親
獅子頭係老爺至愛，呢度賣十蚊一個，我地要左兩個，不過連老爺都食到洒手擰頭，都唔洗再問咯
今餐好壞參半，但係總體算係唔錯(大家有無留意右邊o個碟食到吉晒呢! o個碟就係蛋黃南瓜嘞!)
太多野食，攪到條魚都食唔晒添
呢度裝修幾別緻，食物水準唔錯，呢餐叫錯野都係140蚊，我地跟住仲有一餐會再黎呢度幫趁
食住高鐵上武漢(5)
食完下晝飯，老爺唔想再搵東湖嘞，佢話坐巴士過漢口果便喎，話咁快又上左車，問佢響邊落，佢話唔知架，但係無耐佢就話落車嘞。
跟住佢行左一輪，就黎到呢條好有親切感o既香港路，附近仲有澳門路添，不過我腳痛，就無行到過去咯。
行到黎呢條香港路，首不先就嘆番杯咖啡先
呢條街睇怕改左名唔會超過二十年卦
沿路都有好多食肆
但係最多都係醫院，求其數下都有三四間
我初初以為好短，但係行行下都幾長下喎
仲有銀行添
又有茶葉批發
香港路二站係咩站？原來又係單車站，仲係呢條路o既第二個添
行到170幾號，無晒力咯，都係返歸吧嘞
今晚又返黎武昌呢便呢間華坤賓館住，不過轉左間靚d既房
樓下係廳，要上房係要上樓梯o既
張床都算唔錯。幾錢？都係218啫！
食住高鐵上武漢(4)
去公園做完晨運，老爺又話要去搵東湖喎。今次又上過第二架巴士，架車行左好耐，我都瞓完幾覺，但都未見有湖o既影，肚又開始餓添，咁就同老爺落地搵野食先咯。
落車呢度係商業區，我地響間百貨公司樓上搵到呢間規模幾大下o既餐廳與快餐店結合體，一坐底老爺就攞左張單去攞左幾樣野返黎
其中呢樣係老爺o既至愛，成碟松子魚俾佢個人包辦晒，我只不過掂下咋
我唯有食菜啦，好彩呢度d菜樣樣都咁正
呢d鋪面臘腸就麻麻啫，但係墊底o既豆角乾就認真唔錯
再加個竹筒番薯飯
整多杯黑豆漿
黎到呢度我就夠晒皮，但係老爺再去攞多幾碟喎……包括炒藕條…
…炒菜花…
…灼生菜…全部佢自己攪掂晒！服未！
老爺肯咁博命，除左味道可以之外，價錢梗係得人鐘意啦！呢餐粗略計下，叫左十樣野過外，盛惠……人仔88蚊！因為每樣都細細碟，每碟十蚊八蚊，叫左食唔晒都唔心痛
有機會黎武漢就認住呢間野罅，佢叫做「桂林人」喎，相信唔止得一間
食住高鐵上武漢(3)
黎左武漢第二日，都應該搵d地方去下o既。老爺話聽講東湖風景唔錯，一於去行下喎。但係佢又無預備好功課，一黎就搭錯左車，中左黎一個叫做和平公園，睇清楚地圖，原來係響長江側邊一個公園仔，行落只不過係普通公園仔一個，無咩特色。
瞓醒就搵早餐食，響後街面檔發現呢度好出名o既民間小食 — 熱乾面，其實即係落左好多花生醬o既炸醬撈面咁囉
三幾蚊一兜，勝在夠大眾化，呢度朝早真係人手一碗，響行緊o既巴士佢地一樣照食如儀
食完熱乾面，跟老爺坐左架巴士話去東湖，點知落左車乜湖都唔見，只見一條長堤，堤外面話係長江黎喎
行多一陣見有條廢棄左o既鐵路
呢度路邊d樹生得好靚，d葉全部都黃黃綠綠，好有秋意
睇真d，原來係楓葉黎架！
時屆深秋，成地都係落葉
摸左一輪，卒之摸左入去和平公園，呢度無咩特色，只係呢d羅漢松幾吸引
不過講吸引就點都唔及得呢d響公園門口o既中式漢堡包，但係我地都就快食中午飯，所以就放過佢啦
武漢四圍都見呢d單車站，停左幾架到十幾架呢類單車，老爺埋去望過，話可以免費借用咁話喎
食住高鐵上武漢(2)
第一次黎武漢，人生路不熟，所以第一件事都係搵地方住落先。坐左巴士入城之後求其搵間賓館住落，就出去開始搵食嘞。
黎到武漢已經三點幾，拿拿聲去巴士站睇下有咩車入城先。武漢站巴士又係亂晒大龍，d人無咩秩序，響大陸都算係正常o既，我地等左一輪卒之上左呢架540
架車行左15分鐘左右，見有間似樣d賓館我地就落車，呢間華坤賓館響武漢都有四五間分店，房間都幾闊落，198連電腦都算幾抵啦
我地響武漢停留左四晚，卒之響呢間賓館度前後住左三晚
跟住就行街街嘞，見有小販賣呢d野，原來係生菱角黎o既喎
仲有d係乾o既喎
因為下晝淨係響火車兩份食左個飯盒，宜家有d餓餓地添，所以就摸左入間好細間o既炸雞店，要左呢隻「武漢第一雞」，呢個名號係老爺幫佢改o既，話係我地響武漢食o既第一隻雞喎
睇下老爺食得幾滋味
無耐隻雞就變成咁嘞
幾錢？睇下咪知囉。全雞+可樂，盛惠人仔16蚊
抖左一陣，黃昏時候再出動，經賓館服務員妹妹指點，我地坐車黎左呢度o既百貨公司區-徐東，呢度有個food court叫做戶部巷，係有名o既食小食地方，後來我地至知呢度係分部黎咋，正巷我地遲兩日會去
入面d小食幾吸引架
老爺都唔知響度睇小食定係睇靚女
呢度雖然有好多款小食，但係我地諗住食左正餐先，所以暫時忍口唔幫襯住
老爺左望右望，卒之揀啱呢間叫做皇爵o既餐廳摸入去，呢味肥腸魚片都幾好味
生菜都合格
我揀呢個炆鴨就唔多掂咯
反為呢個賣16蚊o既蛋黃南瓜粒就好和味，我同老爺爭住食
呢餐埋單108，不過不失咁啦
食完正餐，可以返轉頭去戶部巷幫襯小食嘞！呢個蒸蛋食落好似豆付花
湯包唔錯
大餐小餐都食飽飽，就坐車返賓館。響街口見呢兩母女(？)響度賣d好得意o既冷衫仔，原來係電話套黎o既，阿婆話5個鐘至織倒一個賺翻十元八塊
我見呢d冷衫仔幾得意，咁就當幫吓阿婆，將佢掛響度o既3個現貨掃晒，仲講好聽日再黎買埋佢手上織緊o既紅色果個添
我宜家得翻呢件綠色咋
呢班阿姐都算熱愛運動咯，晚晚都出黎表演街頭舞
