響新坡過完靜英英新正頭o既幾日，今日卒之過左黎馬來西亞呢便咯。我地今次因為驚住新年路面巴士票難買，所以就坐多一程AirAsia平價機過黎吉隆坡，我地買來回票，黎呢一程因為仲係年初幾，所以就無咩得平，要52蚊坡仔未連稅，但係回程果張就只係8蚊，認真超值！拉勻黎計，兩套來回機票連埋稅，約莫係1200蚊港紙左右，只係比坐巴士貴一d啫，時間就慳翻一半以上，計落都算係抵啦。
一黎到吉隆坡，即刻進駐我o既地頭-唐人街，黎到梗係要飲翻杯龍眼冰解下渴先啦
呢檔野真材實料，我地次次經過都要整翻兩杯，有冰o既就每杯1.5，無冰o既就2蚊，我地要無冰o既，因為似乎噤飲d卦
黎到梗係要搵地方住先啦，我堅持要住黎呢間AnCasa，事關呢度住開有安全感，都唔好理大老爺呢個花心蘿白成日宜依哦鵝話要試下住第二間咯！
今日可能仲係新正頭，d房好緊張，標準房無晒，得翻d豪華房喎，貴過標準房百幾蚊，要成三百幾，計落等於八百幾港紙，響我地住慣o既價位黎講，都算係貴野咯，但係好彩編倒響十幾樓，樓層夠高開揚d，可以當係補翻數啦
放底行李已經係三四點，老爺一路抗議話仲未開餐行唔郁，於是就入翻唐人街呢間老字號南香雞飯店醫左肚至講
呢度d雞油飯好香滑，d雞又未曾令我地失望過，所以每次黎親都要幫趁翻佢 一兩 餐至得安樂
落單都有學問，d雞佢地係以每人份量計o既，呢個三人份量俾我地兩個食就啱啱好
我地都係前幾次響呢度學識落單果時聲明要雞o既邊個部分，以前唔識就次次都食倒雞胸，學識左就會要「二度」，即係雞上脾咁解，呢部分有雞脾o既嫩滑又唔洗特別加錢
加埋呢碟肥仔芽菜，咁就謂之very good嘞！埋單全部都係20蚊馬仔，52蚊港紙左右啦
俾老爺一輪風捲殘雲，枱面好快就變成咁嘞！又唔怪得佢o既，今朝食完早餐到宜家至食午餐，俾隻老虎佢都食得晒啦！
食完遲來的午餐，無咩細藝，我地去左坐地鐵
唐人街鄰近有兩個地鐵站，一個係Pasar Seni，另一個係Masjid Jamek，我地十日後再返黎吉隆坡果幾日都會成日用呢兩個站
坐地鐵去邊？咪就係去臨時o既長途車站BUKIT JALIL打個轉囉。事關聽日我地去檳城就要黎呢度坐車，以前車站響正酒店隔籬好方便，宜家搬到黎郊區，真係山長水又遠咯，所以要黎熟習下先
轉到黎陳秀連站，又要落車原地再等下一班，因為呢度又分開個叉，梅花間竹至有一班係啱去BUKIT JALIL，就好似我地響上水站分開去羅湖同落馬洲咁
大熱天時去完BUKIT JALIL車站，覺得果度非常混亂，所以睇下就走咯，坐翻車返黎，響Masjid Jamek落左黎，撞撞下又撞左入黎小印度區，d摩囉差將d魚咁燒法，唔知好唔好食呢？
天氣又熱到卅幾度，都係返酒店休息一陣，黃昏至同老爺再出動，又係坐地鐵去有名o既小食勝地亞羅街，因為唔熟路，我地響個地鐵網度轉左幾次車，又上路面行左一輪，先至黎到Bukit Bintang呢度，老爺見有檔雞飯，又話要食咯
呢度d雞雖然無南香d咁正，但係水準仍然唔錯
我呢個叻沙就麻麻地嘞，加埋飲品埋單25，即係70蚊
四圍再撞下，卒之俾我地搵左入黎亞羅街，行到街尾呢檔仰慕已久o既黃亞華小食店，就算飽飽地都要食多一餐啦
呢度最出名就係蜜汁燒雞翼，我地要左三隻
老爺無魚不歡，佢叫左件燒魔鬼魚黎試下，食完又罕有咁讚話都幾新鮮喎
至於d雞翼響我o既化骨大法之下，好快就變成咁咯
加埋呢碟炒芥蘭同飲品，呢餐又報銷左43蚊馬仔，為起黎約莫115蚊港紙啦
