陪老爺巡視華東(2a)

第二日 ：烏鎮 — 上海

尋日匆匆到過下杭州，遇著西湖放烟花咁大件事，大老爺唔鍾意咁熱鬧，決定帶隊夜走烏鎮，於是出巡隧伍就由杭州包左架車黎到烏鎮嘞。夜麻麻黎到，個鎮仔又無咩夜街好行，於是四個人食完晚飯好早就瞓覺覺猪咯。

今日主力入去景區玩，烏鎮景區分開東柵、西柵兩邊，雖然有獨立門票，但係分開買就要人仔二百幾一位，套票係平左一d，亦要人仔150，無拖無欠，都唔好話唔犀利！鬼叫人地咁出名咩，一場黎到，再貴都要入架！大家就一齊跟住大老爺入去睇過值唔值先！

 

黃昏時分，我地響杭州俾人點左去杭州東車站，以為果度會有車去烏鎮，點知去到至知個站搬走左路喎！現場人多車少相當混亂，有五六個大漢成班人好落力游說我地坐佢地d車去烏鎮，講得幾講以為無咩野，就成班人跟住佢地行左一陣，後來越睇就越唔對路，結果大老爺縮沙叫話唔好跟佢地去，結果響街邊另外搵過呢個個樣好似佛公咁o既司機哥哥，坐左佢架客貨車去烏鎮，雖然錢係俾多左，但係就放心好多，事後證明佢亦都好盡責，一直搵路無咩怨言，一直送到我地搵埋賓館至收錢

夜麻麻睇唔倒咩野，第朝至望過對面，睇真呢間我地住唔倒o既雙塔賓館，真係估唔倒鎮仔賓館都會客滿！

我地結果就住左呢間，係就係豆泥d，但係勝在平得黎(80蚊/房)都樣樣齊全，地板仲乾乾淨淨添！

瞓醒覺就搵野醫下肚先，噫！呢度有烏鎮特色喎！

生煎包睇落幾正

羊肉麵好對辨，果一扎羊肉係將幾舊細碎羊肉扎埋一扎黎炆，好好味㗎！

呢餐咁豐富o既早餐每人十零廿蚊，真係非常抵食！

尋晚天黑晒至黎到，都未睇得清楚原來烏鎮呢個牌樓又幾宏偉噃！

沿街都有賣記念品o既檔口，呢檔d扇幾靚

行得一陣，就黎到烏鎮景區o既大門口嘞

俾完150銀入場費，都要望清楚東柵呢個景區圖，睇下有咩咁正先

我地好彩八點幾就入到黎，無咩其他遊人，所以都覺得唔錯 

水鄉呢d屋同大澳果d好似同一祖宗喎

時間尚早，呢d船都未有咩客，但係等陣就難講咯！

東柵呢度主要都係一條河側邊兩條街，街上面有不同主題
o既展館，每入一個就憑票打一個窿入場。呢個就係其中之一o既近代作家茅盾紀念館，原來佢係烏鎮人黎o既

間館無咩特別，只係d窗門幾別緻

另一間係木雕館，呢d橫樑都夠誇張路卦！

水龍會？同救火有關o既？

水龍原來仲有分鐵製同木製o既添！鐵o既點托呀！

宜家仲早，條街無咩人，等多一陣d團黎到，就成條街都塞滿人，你想停下都唔得，仲誇張過旺角！

到左十點幾，人多到唔想再行，睇埋呢間染坊我地就拉隊過去西柵果便，是關多人多到無晒mood咯！

陪老爺巡視華東(1)

第一日 ： 杭州 — 烏鎮

 

大老爺趁住仲行得郁，上個月尾又話要去上海視察民生喎，小女子唔放心佢一個人四圍去捐，於是就組織起一個護衛隊隨團出發，隊員計有：

蟹后夢夢 — 專責各大小湖泊大閘蟹事宜；

黑星隊長 — 搬運組總隊目，專責各種擔擔抬抬以及叮噹事務；

小女子 — 當然總指揮，一於指東指西，專責指生晒有關事項。

一行四人就響10月底一個和暖o既冬日出發，直飛第一站杭州。

深夜黎到杭州，響抖左一晚之後，第日朝早就包左架的士四圍遊嘞。第一個落車點係西湖側邊一個不知名o既花園，呢度繁花似錦，d紅色燦到人連眼都打唔得開咁滯！

 

 

係咪人比花嬌呢？未開飯o既可以慳翻一餐咯！

 

 

響大老爺指示下，架車跟住就上左龍井山

 

 

試下「龍井問茶」o既滋味先！

 

 

果棵植物係桂花黎o既

 

 

時值桂花盛開時節，雖然d賣茶葉o既阿閃話，宜家離「滿隴桂雨」o既最佳日子已經遲左幾個禮拜，但係我地架車停左響度一陣啫，已經有「滿車桂雨」o既淒美效果嘞！

 

整翻杯雨前龍井哩！

 

響龍井買左d茶葉之後，架車就送到我地黎西湖十景o既另外一景「虎跑夢泉」嘞，今勻輪到夢夢唱主題曲

 

 

呢度成個區景色都唔錯，呢15蚊入場費相當值得

 

 

真係有老虎架！

 

天下泉水，佢名列第三

 

玩完虎跑泉，司機哥哥就車左我地黎呢個園林小餐廳度食下晝飯

 

 

佢d醉蟹腳唔錯架！

 

呢個紅炆魚頭就更加搶手添！

 

 

d野味道唔錯，價錢又唔貴

 

 

呢度附近環境清幽，有十幾幢呢一類三層屋仔，大部分都係一間酒店仔(motel) o既房黎o既

 

 

壁報板仲貼滿人客留言添！我地都問過下價，打算今晚搬黎呢度住翻一晚，但係佢地話......全場爆滿，無房！

食完飯我地坐過第二架車，黎到六和塔景區，想話登塔試下「六和聽濤」，夢夢一見條上山石級路就話唔多想擒上去，我又無乜電，於是就響附近求其行下就算嘞

 

 

響六和塔扮皇室人員o既呢班臨記唔多專業，著起龍袍都……我地見無咩好睇，響附近再買左一d茶葉就離開六和塔，返入市區咯

 

杭州宜家市容不斷轉變緊，連呢d半新不舊o既建築物都要提早完成任務，拆缷改建

改做咩野？咪就係呢一類超時空大廈囉！

 

 

由於西湖今晚有一年一度o既煙花匯演，所以d住房好緊張，我地開過會之後，決定趁未天黑就離開，向下一個目標：烏鎮進發。

有嘢食！

擒晚大老爺去左上堂，得閑無事炒左碟三色米粉做晚餐兼明日o既午餐。希望大老爺喜歡啦!!

星期六、有好局

呢個禮拜六雖然好熱，但係過得好充實。新加坡o既網友Mommy Dearest黎左香港玩，我趁佢得兩個鐘空檔，就同佢響旺角high tea，…… (重有...重有....特此多謝Mommy既伴手禮添!!!)

到左黃昏，會合翻大老爺去左九龍城食飯，今次揀左好耐無幫趁過o既老牌海鮮酒家竹園，又睇下佢響金融海嘯之下，宜家係咩境況先。五個人坐低，場面都好旺下，七點鐘d枱就坐滿晒，睇下個餐牌就無乜好揀，全部都係套餐，而且全部套餐都係算人頭計，每位大約150蚊，記得十幾年前都係每人收百幾，宜家都仲係咁o既價，都可以算得係益街坊咯！價錢雖然唔貴，但係款式可以選擇o既範圍就唔大，呢個都算得係佢做左咁多年o既特色。

 

首先上黎o既係例湯，例牌貨色啦

 

豉油皇煎中蝦就幾香口，相當唔錯

 

再黎都係香口o既燒乳鴿，暫時放埋一邊先，因為主角駕到…

 

主角就係佢嘞…芝士龍蝦加伊底，數下呢d本地蝦仔o既數目，都有成十幾件，而且食味唔錯，份量又非常OK，可以講得話大件夾抵食！

 

蟹子蒸扇貝都好好味

 

鮑魚仔一人兩隻，普通些少

 

今晚呢條海上鮮就變左做配角

 

加埋呢碟芥菜胆，飽飽！

 

呢餐仲有任飲盒裝橙汁、清涼蔗水、啤酒，免加一埋單800，人均消費160，算得係幾相宜咯

 

食完好飽，再響九龍城散下步先，行過見呢檔生果檔擺賣緊一d幾千蚊一個o既有「型」西瓜，有無客架？

 

呢個瓜王唔知又要賣幾銀呢？

黃花魚

禮拜六天氣熱得利害，出街行下都一身大汗，真係邊度都唔想去！於是又帶埋御厨大老爺一齊過去大圍探下師傅，順便望下夢夢間夢居裝修完正常運作未。初初唔夠腳就捉埋大老爺戥腳，後來多多黎到，大老爺就退下火線，去左做佢應該做o既事--入厨房攪今晚o既餸菜嘞。自從佢學識左呢味切件煎黃花之後，先後整過三次，以呢次最令人滿意，兩條黃花魚俾佢整到有紋有路，至於果兩碟西芹雲耳炒中蝦都係一般水準啦，洋葱炒蛋亦都過得去，至於夢夢炆d冬菇同豬肉都好好味，呢餐又食得大家好滿足，平平安安咁又過左一個大熱天時o既星期六嘞。(特別鳴謝淨飯王同多多提供相片，令到呢篇blog得以順利完成，多謝！多謝！)