舊年年尾相公身體麻麻，所以到左年廿九至決定上去中山同廣州過大年玩翻幾日。
年廿九上到中山夢居已經接近黃昏，諗起咁耐都無試過去食豬肚雞，於是又約埋大家姐一齊去試下，天寒地凍之下食呢個豬肚雞窩醒神又暖胃，四個人食到最後幾乎連個湯底都飲埋，價錢唔貴兼且味道的確又幾好喎，下次可以再黎幫襯。
年卅晚下晝就幫襯大記，水準依然非常之掂，西洋菜啱啱當造，正！午後行下平東花市，夜晚就去威尼斯食西餐，都好多人下喎，中西合璧o既年夜飯又食得幾高興。
鄉鎮地方年卅晚自然少唔得爆仗聲啦，接近午夜時份，四圍熱鬧非凡，就係咁樣，老鼠仔就響烟花炮仗聲中俾隻金牛送走左嘞！希望各位blog友響新o既一年都身壯力健，萬事勝意，得心應手啦！恭喜恭喜！
今日又黎打攪夢居主人
呢個豬肚雞窩料正湯濃，非常對板
湯底有走地雞同豬肚，我地四個人仲叫左肥牛、枝竹、魚皮、青菜，另外再加多碟中山瀨粉，就非常夠皮！湯底好好味，我地先後加左兩次，最後都俾我地清晒兜咁滯
第日就去左平東行下花市，呢d染過色o既銀柳都幾受歡迎
只不過係下晝啫，靚靚金桔已經大割價平賣，叫到廿雞一盤，淨係買過皮蛋缸都抵翻！
呢d唔知叫乜花呢？
連盤栽都有！
大記o既菜膽雞好有雞味
茶樹菇牛柳味道一流，菇身又夠粗壯，好！
爽脆菜心用油鹽水浸，平淡中自有菜根幽香
上湯西洋菜一上枱，就唔到你唔讚話正斗！
沙窩魚頭煲醬汁合味，份量足夠，連煲底d香蒜都俾人食晒！
初一朝早就起程上去廣州，睇過今年省城春節情況又會係點至得
