陪老爺巡視華東(10b)

第十日 ： 南京 (中華門、紫金山)

 

十一點玩完中華門，去翻野馬食完晏之後搵倒間Motel 168連鎖店，呢間酒店仔又幾啱我眼緣，做埋會員仲可以有特價優惠入住，為起黎都係二百蚊倒，我地要左兩間房，自此就同佢結下不解之緣，跟住黎o既華東日子好多時都入住呢一系列o既酒店。

住落之後，我地諗住坐的士上紫金山玩，但係遇著個無良司機，載我地去到山腳吊車站就放低左我地，真係無職業道德！正在考慮緊好唔好坐呢d好唔抵、兼好牙煙兩腳懸空o既吊車上山o既時候，好彩大老爺又搵倒另一個好心的士司機，佢啱啱響山上空車落翻黎，俾大老爺截停左，問佢願唔願意再上去，佢笑笑口話無問題！後來我地見佢幾好人，就同佢講100蚊包佢架車兩個鐘，佢又好歡喜咁應承，咁我地今日又唔洗四圍搵車嘞。

上到山頂d風都幾猛吓，有d微涼感覺，冷鋒果然真係殺到嘞！睇完山頂d天文設施之後，個好好司機載我地去無幾遠o既美齡館參觀，雖然呢度無咩特別野好睇，但係只收15蚊入場，都唔可以要求咁多。響度我地買左幾條絲巾，大老爺又買左張地圖。

參觀完美齡館之後坐翻果架的士落山去夫子廟商業區，天氣入夜後就真係明顯轉冷左！響度行得唔夠半個鐘又大風又凍，都係搵野食好過，6:30三個人中左上去一間叫做傣妹火窩o既樓上鋪，就咁望下門面，以為佢係一般火窩店，上到黎至知地方好大，有成幾百張枱，裝修得又好新潮，似係做後生仔生意多d，價錢真係抵到你唔信，每款火窩料都係三幾蚊，雖然都係大路貨無咩矜貴野，但係勝在無欺場，碟碟都有翻咁上下，我地點左成三十樣野都唔洗100蚊！今餐食得好飽！好飽！

天寒地凍，食完呢餐就坐的士返去Motel 168覺覺豬。

 

今朝又返黎野馬食下晝飯，水準依然令人滿意

 

尋晚果間賓館仔住得唔舒服，今日呢間motel 168就唔錯嘞

 

諗住坐的士直上紫金山頂，但係個無良司機載左我地黎到山腳呢個纜車站就放低我地！做空中飛人喎，你制唔制丫！

 

卒之都係搵過第二架的士，安安全全咁上到黎

 

呢度以前係天文台黎o既

 

100年前呢d儀器真係有用架

 

宜家都仲可以做展覽品，一d都無嘥

 

呢d半圓頂建築物，應該係天文望遠鏡卦

 

山頂望翻落黎南京市

 

紫金山所在o既鐘山山脈食正風水，所以前有朱元璋，後有孫中山都睇中響呢度起陵墓，不過整左條纜車線響度唔知有無攪壞到呢？

 

入夜真係開始凍左，我地摸左上黎呢間傣妹火窩打邊爐

 

D火窩料真係平到你唔信

 

每樣三五蚊，份量又唔少添

 

我地叫左成卅樣野，呢度係其中o既廿幾樣，後來補單要多幾樣菜，夾埋100蚊都唔洗！

 

三個人卒之食到攬住個肚走