由廣州食到中山 (1)

中秋攞多一日假，加埋有四日，又同大老爺上左廣州搵食。一到埗就去左必食o既鳳厨食左餐炒大魚片、魚腐加雙皮奶，因為正得滯黎唔切影相，所以無得睇。

下晝去左行萬菱廣場，遇倒一場特大豪雨，差一條馬路都要等左一輪至過得倒去。到左夜晚，本來諗住去第二選擇o既麒勝，但係去到人山人海，就轉左去後面街求祈搵間食一餐，但係呢間野真係唔係好掂，下次都唔洗再諗。

第朝飲完茶依照雨落橫山俾o既貼士去參觀博物館，坐地鐵黎到珠江新城，行出黎見倒廣州高大威猛o既新地標電視塔，再搵左一輪至搵倒間博物館，兜黎兜去排一輪隊至攞倒張免費飛，入到去都已經係點幾鐘，入面地方好大，一個半個鐘根本無辦法行得晒，呢個時候仲肚餓添，見對面有間名食店「丙勝」，醫肚緊要，最多第日至再黎行過，於是就過對面食左飯至算。

兩點幾入到去，叫果樣無果樣，我地想點三樣菜，結果要點足七樣至有三樣野食！雖然水準同地方都仲算唔錯，但點計係都係鳳厨抵食d。

食完就坐車落中山睇下夢夢間屋整成點先。

 

第一次幫趁呢間野，唔係好掂！

 

煎倉魚雖然唔夠火候，都算合格

 

手撕雞麻麻地啦

廣州地鐵網絡發展得好利害，真係四通八達

跟足指示黎到珠江新城

出左黎就見倒廣州新地標

呢間博物館開左無耐，好多配套設施仲整緊

最難得係唔洗收入場費

入面好大，我地行左呢個寶石區先

D石頭幾靚架

天然孔雀石

最終都係扺唔住肚餓，都係要出黎食左飯先

但係兩三點呢個時段，叫乜都無！

叫足七樣至黎齊三樣

水準都算幾好

所以好快就變成咁嘞！