食住高鐵上武漢(1)
趁住老爺可以放三日假，本來想去新加坡hea下，臨急臨忙問下機票又都幾貴，所以最後決定慳慳地，同佢一齊坐高鐵去武漢四圍遊。
怱怱忙忙執好背囊，禮拜二晚放工就起程，深夜黎到廣州東站，響附近先住一晚，第朝轉坐302A巴士去到廣州南站，即買即上聞名已久o既武廣高鐵，三個零鐘之內穿越廣東、湖南直達湖北武漢，試吓一個鐘一個省既滋味。人地話最快話可以去到時速350幾公里喎，但係呢程我都唔多覺有去到過350，只係見多數時間響300-340左右，最高見過348咋。票價全程人仔490，都幾貴吓架。
今次總共響武漢三鎮逗留左五日，因為我腳痛行唔得遠，所以就無去到其他城市，遊黎遊去都係響武漢三鎮之間轉黎轉去飲飲食食咁囉，大家有興趣o既話，跟住黎幾日就睇下我響武漢食過d咩嘢啦。
響廣州東站有302A巴士去廣州南站，全程大約45分鐘
高鐵車站起得好骨子，成個機場大樓咁款
廣州正值亞運期間，所以有d咁趣致o既裝飾
武廣高鐵班次頻密，每個鐘有三四班車，所以唔洗趕
老爺話閒日去到至買飛都唔遲，果然埋到去就買倒半個鐘後開o既班次
除左外型睇得之外，車站裏面都好有機場feel
直頭有d超時空感覺添
夠鐘上車嘞
我地坐8號卡，係車頭第一卡
個車頭幾醒目靚仔喎
呢架車個顯示板唔係好清晰，d字又蒙又細，所以好難影得清楚，今次只係影倒326咋
車外景色都幾清楚，完全唔覺話開得快而睇唔倒風景喎
我地坐o既係車開11:20，所以中午飯就響車上解決
呢個飯盒25蚊人仔，都食得過喎，味道都算可以架。呢班車總共停左成十個八個站，用左差唔多四個鐘，比起我地坐返黎果班用多左大半個鐘
哇~ 個車站好cyber 而家大陸交通發展真係犀利 搭火車去邊都咁快
回覆刪除[版主回覆11/16/2010 22:10:00]d車仲越黎越快添呀！出年上海去北京話會去到時速380喎！
有冇測試掉轉樽水都唔會倒下呀﹖
回覆刪除[版主回覆11/16/2010 22:15:00]我瞓左覺呀，你下次自己試下啦。
我都好想坐高鐵！睇下妳個行程有乜好玩同好食先！
回覆刪除[版主回覆11/16/2010 22:15:00]玩我就無去到咩地方呀，但係食就食到過晒龍咯！
個車站好靚喎...
回覆刪除[版主回覆11/16/2010 22:15:00]跟住上菜果時， miss 仲話靚添呀！
高鐵都唔錯，坐得舒服，我上次由廣州上武漢，不過在早一個站下車，但在車上食飯盒要人仔25元，平一點的賣晒，但由武漢坐返廣州時，飯盒一律要人仔23元，真奇怪。
回覆刪除[版主回覆11/17/2010 19:28:00]都唔奇丫，上去果時新鮮熱辣，到返落黎都已經係賣剩蔗咯，所以咪平 d 清貨囉。
(Empty)
回覆刪除It's always so nice reading about your travel experience!! The train station is Beautiful! I love to ride trains, they are more comfortable than plane and always on time!! Good choice!!
回覆刪除[版主回覆11/19/2010 20:03:00]多謝你誇獎。宜家 d 火車的確係幾舒服，但係收費都追得住飛機咯！
想像坐高鐵舒服過坐飛機好多... 腳痛還可以在武漢三鎮( 係市鎮, 唔係紙鎮喎!!)轉來轉去(即係行來行去呀? ), 已是神奇女俠的修為級數...; 我腳痛是寸步難行的呀..
回覆刪除[版主回覆11/19/2010 20:04:00]
坐火車的確有唔少好處，但係收費都幾貴，一般大陸人民唔知負唔負擔得起呢！
我今次去武漢係淨係食野咋，而且好多時候都係搭的士出入，脫離晒老爺一向 o 既巴士客作風，佢仲哦哦聲話度度都去唔成喎