兔年春節新馬遊(5)

今日開始北上，幾年前去檳城果時車站就響正酒店側邊，今次車站就大裝修，將成個大車站搬左去郊區，所以路程轉折左，好彩尋日去探過路，所以今朝就可以施施然食完早餐至去坐車。

今日正式出發去馬來西亞北面由檳城玩翻落黎，尋日探過路，所以今日好順利就黎到BUKIT JALIL站轉車

10點未夠去到買左飛，35蚊馬仔一位，一買左飛啫個肥仔就拿拿聲趕我地上車，仲以為好快會開車添，但係等下等下，都要等到成十點半至開，一路到兩點幾三點去到怡保附近至停車，停車我以為有地方開飯啦，但係又無喎，仲響度等左成半個鐘，原來係佢地將呢度變成中轉站，不同地方黎o既車將d客再分不同終點站歸類轉車，但係期間淨係講馬拉話，攪到我地呢d唔識聽馬拉話o既幾乎轉唔倒車添！

四點去到檳城，又係上次果個車站，照翻上次咁行左成半個鐘去巴士站等車入城，等左一輪至有車上，點知架車行得兩行又轉翻入大車站，今次真係搵笨咯！入到市區，個肚餓到咕咕聲，響附近搵左間似樣d既餐廳，拿拿聲叫野食先

 

我地叫左雪糕紅豆霜

雞脾飯+叻沙

炒羅白糕

仲有煎蕊

六樣都係25蚊，都算認真抵食咯

食飽飽就坐101號巴士入去ferringhi沙灘，呢度我地上次黎過，所以大概情況都知道下，呢度o既酒店價錢兩極化，一係就近沙灘高檔貨貴到飛起，一就係近山邊客棧式，中間無咩中價酒店。行到Holiday Inn Resort呢度我又熱又攰，老爺走去問下幾錢，話要430蚊，為起黎1100蚊左右，我都唔想再行咯，是鬼但啦，幾多錢都要豪翻一晚咯

過千蚊一晚，梗要影多幾張相啦

放底行李，就落去巡視下間酒店先

酒店行出去就係沙灘，雖然已經成七點，但係天都仲未黑，仲有好多人響度排隊玩水上降落傘

又幾激下喎！

 

好似飛上西天咁！

連嬲頭黨都要玩埋一份，都咪話唔吸引

睇下嬲頭女殺手同黑摩利幾咁全神貫注聽講解！之但係到佢地玩完一圈返黎果時，我就知佢地無聽人教書嘞，事關佢地落左兩次都落唔啱沙灘，要兜完一個又一個圈，事後唔知洗唔洗加佢地錢呢吓

睇完人地玩降落傘之後就日落西山咯

黃昏搵飯食，行過去泰菜館GOLDEN THAI望下，價錢好犀利，幫趁唔落

再沿住D檔口仔行完一轉，最後佢揀左入黎呢隻船型餐廳度

佢門口個餐牌寫住好多野食，之但係入到去至話無中餐供應喎

老爺卒之叫左呢個炸魚，佢食到MM聲，水準之差唔洗多講，埋單仲要65蚊馬仔，真係把鬼！