兔年春節新馬遊(8)

今朝跟完一日遊，下晝又回復自由身，我地叫司機林先生放我地響姓周橋呢度落車，等我地自己四圍閒逛。響橋度行左一陣就遇到香港黎o既Molly同Vincent，佢地都係自由行，啱啱去完印尼玩，響檳城轉機聽朝就返香港，兩個後生仔女俾個阿伯帶住四圍行，聽呢個阿伯自己講，佢退左休閒時好鍾意主動帶d遊客四圍去，做免費導遊，佢地兩個細路見得世面少，摸唔清楚阿伯想點，老爺聽得幾聽都已經估倒幾成，阿伯無非係想賺吓免費飲飲食食，最好就係有些少外快啦。

呢度叫做姓周橋，點解地名咁得意呢吓？

原來呢d係早期華人移民搭建響海邊棧橋上面o既居所，佢地因為地域、籍貫、姓氏不同，聚居點亦都唔同，漸漸成為唔同姓氏區域

除左姓周橋之外，仲有姓林橋、姓陳橋、姓楊橋、姓李橋等等

自從檳城成為世界遺產城市之後，姓氏橋亦搖身一變，成為觀光勝地

各方遊客多左，有d高腳屋就順便做埋民宿生意

呢度都有幾成似大澳噃

阿伯帶我地黎參觀呢間高腳屋裝修得好靚，唔知遲d會唔會做埋民宿呢？

主人家響度打緊麻雀，但係佢地d麻雀牌係咁款o既，都唔知點玩呢？

佢地每個姓氏都會組織一間公司，管理d祠堂廟宇，呢d公司就好似宗親會咁，係社團組織黎o既

睇完棚屋出黎，跟住請阿伯去對面食下午肉骨茶，響茶檔遇倒呢對新人，我唔執輸拿拿聲上去同佢地影翻張相先

一路食肉骨茶，阿伯就猛咁話好鍾意同我地一齊喎，佢個心可能係讚緊我地識做啦

佢又問我地今晚仲要去邊，我地話想去新關仔閣食野，佢就話要帶埋我地去喎

下午茶食完，就起程坐巴士去新關仔閣

 

有人帶總好過自己四圍摸，有阿伯帶路，好快就黎到新關仔閣嘞

黎到新關仔閣海邊仲係好早，響度同阿伯影翻張相先

 

兩個細路到宜家仲係唔知呢個義工阿伯個心點諗

呢度d檔口新年開得一半左右，好多檔口仲休緊息

以當晚水準黎睇就完全唔掂嘞！

天差唔多黑就開始叫野食

老爺行左一輪，買左一盆立立雜雜炸野返黎，話用左34蚊馬仔

咁呢堆野咪成八九十蚊！食落10蚊隻蟹霉o既！完全唔掂！其餘d蝦呀、魚旦呀都係好普通，義工阿伯問呢盆野洗唔洗十蚊喎！老爺呢34蚊都算係洗得冤枉咯！

其餘佢地買翻黎o既野都好普通，整體黎講總之就係差囉！

老爺等兩個後生仔行開就俾左封利是阿伯，雖然少少地廿蚊，佢都好似幾滿意咁，多謝左幾次。佢地兩個細路住近機場，聽朝就返香港，阿伯帶我地去左巴士站，等左一陣無車黎，佢兩個又想跟我地返紅花園再食多餐，咁就四個人坐的士返去。點知去到紅花園今晚無開，可能因為聽日係神誕卦！佢地無口福，唯有各自返歸瞓覺覺豬