奀豬師太 Blog

2011年5月16日星期一

兔年春節新馬遊(15)

呢個假期又到左尾聲，玩埋呢兩日就要收拾心情返香港再捱過咯！

好彩臨尾都摸左黎呢個響吉隆坡市郊o既吉膽島，玩左好開心o既大半日。呢度o既環境同氣氛都同大澳好相似，充滿漁村風味，生活節奏悠閒緩慢，啱晒老爺口味，難怪佢次次都話要黎呢度啦！

我地響島上食左個相當唔錯o既中午飯，下晝就返去吉隆坡，夜晚行埋雙子塔，咁呢個馬拉行程就差唔多完結嘞。

吉膽島碼頭

吉膽島有好多棚屋

D街道又同大澳差唔多，難怪老爺一見如故

呢度住o既大部分係廣東、福建移居馬來西亞o既華人第三四代

佢地d屋起得幾靚架！

行行下又係食飯時間，幫趁下呢間飯店仔先

炒蟶子好味！

咖哩魚都唔錯

加埋炒菜，呢餐海鮮餐60蚊，抵食

佢地d屋係咪好型呢！

地方行政官員做得好，都會升格做神仙俾人供奉架！

呢班後生仔女好活潑，仲請我地食糖添，同佢地都幾啱傾。係呢，呢度咁靚，你咪以為係屋裏面喎，其實係屋門口黎噃！

整路一齊夾錢，係咪收買路錢呢？

呢d橋係咪好似大澳呢！

有杧果摘呀！

仲有蓮霧添呀！

島上廟宇眾多，拜得神多自有神庇祐，信多幾個安樂d卦

呢度有個別名叫做螃蟹島，唔嫌棄可以響呢d旅館住一晚，深入體會一下漁村風味

行完吉膽島，坐火車返去酒店休息一陣先

跟住夜d去雙子塔蒲下

再響網上有名o既Madam Kwan食晚飯，呢餐同下晝一樣價，又係60蚊，不過老爺唔鍾意呢d風格，食到擰晒頭

2011年5月8日星期日

響邦咯島好悠閒咁過左兩日，今朝執好野預備返吉隆坡。尋晚行雷閃電落足一晚大雨，今朝個地下仲係濕濕地。八點落去食完早餐就離開酒店坐的士出碼頭，坐9:15船過返紅土坎，呢度好多間巴士公司有櫃位賣去吉隆坡o既車票，老爺揀左間紅色o既以為鴻運當頭啦，買好10:30車票就響度等巴士，期間但見其他公司o既車開完一架又一架，呢間野就總係無車，老爺10:45走去問個賣飛肥佬，佢話架巴士響第度開緊黎喎，其實開10:30都已經係遲過人地架嘞，但係仲要誤點成廿幾分鐘都仲未見車影，過多一陣，老爺再去搵個肥佬理論，嘈左佢一輪之後，佢卒之肯退翻錢，老爺就走過隔籬買過其他公司o既車票。

佢老板丫，呢個時候架紅色車就到嘞，仲要開先過我地後來買票果架添！不過點都好，三點半卒之平安返到吉隆坡BUKIT JALIL車站。但係因為唔熟路又虛驚左一場，架車經過市區停左一站我地無落到，之後架車又上翻高速路，再行左成半個鐘，好似一直向馬六甲方向駛去，我地仲以為坐過龍添，好彩最後都係停翻響BUKIT JALIL車站。

落車老爺話想試下住其他區，我就話住翻唐人街好d，話晒都識d街道同鋪頭，搵食都易d丫。我地跟住就轉地鐵返Masjid Jamek，四點幾落車好肚餓，行完一輪又行錯路，卒要坐的士返唐人街，成四點幾鐘至黎到唐人街，而且仲未食下晝飯添，響度求其搵間野食左午飯先，我揀左間以前幫趁過o既，叫左蝦炒旦、什菜、炒飯，食飽跟住就搵地方住，我一睇對面有間5 Elements，門面都算唔錯，呢度10樓以上分成金木水火土五層特別樓層，d房會貴d，宜家佢俾左10樓我地住，唔洗加錢。