響中山過左個熱鬧o既年卅晚之後，初一就坐車上左廣州。廣州今年春節市面好似比往年旺返dd，可能經濟唔好關係，影響到習慣返鄉下過年o既民工都少左返去，所以市面好多鋪頭都照常營業，d食肆到左初二大致上都開翻晒，咁就益左我地呢d為食友咯。今次響人民中路五羊城酒店附近又俾我地發掘倒一間水準唔錯o既「鳳厨順德私房菜」，d出品好對板，我地下晝食完一餐，夜晚諗諗下又去食多一餐，大致上都好滿意，以後又多左個藉口返黎廣州兩頭貢咯！
初一朝早黎到廣州，落車果時發覺氣溫低過中山成五六度，仲落d毛毛雨添，冷到我地要拿拿聲坐的士去投店，將d頸巾冷帽攞晒出黎，咁至頂得佢蒲！
適應左氣溫之後，又出動去搵食！今次行返去舊年黎過呢間酒樓，仍然相當旺場，但見d服務員妹妹做到氣都咳！
今次我地點左乳鴿、茶樹菇炒肚絲、魚蓉湯浸西洋菜，仲有一個老火添，水準都可以，一百零幾蚊落樓，新正頭都算係咁上下啦
初二瞓到日上四竿，天氣又濕又冷，到左下晝成兩點幾至去搵食，今次就俾我地發現附近開左間新嘢
價錢唔貴，掛正順德招牌，應該可以有合理期望啦！
點好菜就坐定定等食
黎嘞！呢個賣25蚊o既魚腐扒菜膽，原本係小棠菜，我地將佢改左做生菜底，上到黎色香味都非常之正，一於郁佢！
再黎水鄉釀鯪魚，都係25蚊，可以拍得住黃媽媽o既水準
仲有一個鳳城野雞卷，上菜見個樣都已經好肥膩，咬落去仲係啖啖肥肉，所以都係食左兩件就算嘞！呢味嘢凍天一定唔啱食，係我地叫錯左
呢餐咁正o既午飯都係用左七十幾八十蚊，相當唔错
食完飯四圍行，見有個著住件怪獸裝o既物體停響屈臣氏門口，不斷咁敲住面小銅鑼博人地俾買怕費，點不知敲左一輪間鋪頭都無人啋佢……
擾攘左成五分鐘都無乜結果，隻怪獸只好死死地氣走人，希望搵過第二檔淋善d架啦！呢種個體戶新春敲竹槓方法，比舞隻醒獅上門可以慳翻幾個人手，但係成功率就低好多卦！
跟住我地就坐車去左陳家祠附近行下
呢度d新春布置都幾好樣喎！
天寒地凍，又整支四蚊雞o既蔗汁暖下胃先
到左夜晚，搵唔倒邊檔好食，於是又走翻黎鳳厨再食一餐。呢個鬆脆南乳骨好香口，但又係犯左野雞卷個毛病：凍左就差好遠！所以又係放埋一邊等打包攞走
呢個菜心炒大魚片就唔同嘞，菜甜魚滑，一上黎就食到唔停得口，雖然大魚炒片多骨左d，但係勝在啱晒味道，所以成碟大份量o既菜好快就俾我地攪掂左嘞！
最後仲有一味翻點o既魚腐扒生菜，又係食到清晒碟！
呢餐又食又擰，都係七十幾蚊，認真抵食！食完呢餐第朝就預備返歸，無乜好講咯，咁呢次中山、廣州食之旅又完滿結束嘞，各位請請！
