新馬兩頭行 (6.6)

D6  檳城—浮羅交怡

 

食雞飯午餐
乘船過北海
坐車往Alostar
轉車往瓜拉吉打
乘船往浮羅交怡
晚餐於「海鮮船」餐廳

睇左咁多娘惹博物館展品，都睇到大家有d攰路卦！好彩卒之都睇晒咯！我地本來打算當日下晝就響檳城坐船直過去浮羅交怡，但係我個懵公睇錯左時間，大安旨意以為下晝兩點至開船，去到至攪清楚原來去浮羅交怡o既船一日得兩班，都係朝早開o既！要坐呢兩班船就要明天請早咯！

檳城我地已經停左兩日，決定唔再留咯，一於改道坐短程船埋岸，再轉多兩次車去另一個比較接近浮羅交怡o既碼頭至再駁船過去，一於起行咯…

臨離開檳城，食左呢檔雞飯又好夠水準，又嫰又滑！

跟住就上左呢隻相當大o既船過去北海

望下駛黎駛去o既船，又有d似我地以前d汽車渡海輪喎

回望檳城o既地標「光大」，的確係相當鶴立雞群，但係就係因為佢起得太標青，宜家好似話因為呢座建築物太現代化，因而影響佢地將檳城申報世界文化遺產o既資格喎

埋北海碼頭罅！

坐長途車無乜好講，轉左兩輪車，話咁快就黎到瓜拉吉打o既碼頭

D船樣麻麻地啫，d水色又唔多掂，去到唔知會點呢？

一齊等船呢個小嬲頭黨件鮮紅頭巾好搶眼喎！

船開罅，排好隊上船先

黃昏時份，卒之踩到上黎浮羅交怡咯

坐的士入去沙灘搵左酒店住落之後，就幫趁附近呢間叫做「海鮮船」o既餐廳食晚飯，呢味胡椒蟹係我地成個馬來西亞行程裏面食得最滿意o既海鮮

仲有炒豆苗都唔錯

呢味啤酒雞都可以啦

Yummy！

Yummy！Yummy！

呢餐食左68蚊馬仔，換轉港幣都係百零，淨係隻生猛肉蟹都抵翻啦！