新馬兩頭行 (7.2)

D7  浮羅交怡

 

旺季酒店滿
大風吊車停
左右騰騰貢
無樣做得成

 

新加坡同馬來西亞d學校都係響12月放大假，情況就好似我地放暑假咁，d家長就趁住呢段時間同d小朋友全家人一齊出去玩，我地遇啱呢個時候黎到，就只有無可奈何咁同人地爭d有限o既旅遊資源嘞。

黎到浮羅交怡Cenang Beach，呢個情況就更加明顯，特別響搵酒店落腳呢個必然關節度，就感受得特別深切。我地住開果d百零蚊馬仔o既中低檔酒店，響正星期六日呢兩日就幾乎全部爆滿，我地尋晚住果間158蚊o既Lanai Resort雖然話係舊d，但都總算係有房丫，但係我地先入為主唔鍾意佢，所以今朝就退左房攞齊行李，一心諗住行過隔籬間三百零蚊o既Holiday Villa豪翻兩晚啦，行到去佢櫃面一問，點不知佢話d中低價房全部都俾人book晒咯，只係淨翻d七八百蚊一晚o既豪華房！

豪都要有個譜至得架，貴成咁梗係唔制啦，於是就展開今日搵酒店之旅嘞。

 

首先黎到呢間有個西班牙名o既，環境就一流罅，但係價錢同樣都係一流

 

要成千幾蚊一晚喎！唯有過主啦！

 

呢間木木獨獨o既都要八百幾！

 

沙灘邊o既高檔貨都係咁上下架罅，不如改變方針，去馬路近山邊果便試下，卒之搵倒呢間，個泳池都幾靚丫

 

兼且無論設施同價錢我地都好滿意，但係…唔好意思…今晚都係客滿！聽晚至有房！好！難得樣樣都啱心水，我地book定房先，聽晚至黎住過！

 

未曾搵倒房住，但係又肚仔餓咯，都係開餐先！隨便響路邊搵左呢間泰式餐廳醫下肚先。炸軟殼蟹只不過係普通貨色

 

通菜又係例牌水汪汪

 

炒米粉算係勉強合格啦

 

簡簡單單三四十蚊又攪掂一餐

 

食完飯派隻懵公繼續出去搵地方住，我就響度抖下先！結果又俾佢搵倒呢間位於沙灘側邊o既Motel獨立屋仔

 

價錢仲係好相宜添，只要100蚊馬仔！若果唔係踫啱旺季，可以揀位於沙灘旁邊果幾間仲正添呀！

 

攪左大半日卒之搵倒今晚o既歸宿，放好行李就出發去島o既另一面，諗住坐吊車上山感受一下懸空馬蹄鐵o既震撼力啦，點知坐左成卅蚊的士黎到，吊車又因為風大暫時停開喎！又會咁好彩o既！

 

睇落又唔係好大風啫，d樹都無乜郁動！但係人地都係為左我地安全着想啫，唯有等下睇過遲d會唔會開啦

 

人人都係咁等，唯有慢慢遊下呢個類似昂平吊車站o既商業區打發下時間

 

於是小動物又影一張

 

欄杆又影一張

 

見倒嬲頭黨又同佢影一張

 

嬲頭黨見我地同佢影，佢又好高興咁搵埋d親戚同我地影翻夠本

 

行完一輪都無乜聲氣話會開，就坐低飲杯青瓜汁先

 

嘩！原來懵公杯芒果汁仲正！真係俾足料用晒成個芒果整呢杯嘢出黎喎，好味！再等多一陣，見吊車都無乜希望會響今日開翻，既然無乜緣份上山，唯有早d返歸把啦！返黎果時路經機場，順手又訂埋返去吉隆坡o既內陸機票，Airasia真係好鬼抵，百零蚊馬仔就可以直接飛返去吉隆坡，用多一百蚊，就可以慳翻十個八個鐘車程