新馬兩頭行 (8.3)

D8  浮羅交怡

Casablanca餐廳
怪味蝦

 

住響間咁正o既酒店，梗係唔好浪費左個泳池啦，所以玩水都玩左幾個鐘。

夜晚肚仔餓，就行落酒店對出o既餐廳食晚飯，間嘢個名好煞食，叫做Casablanca喎，個老細又後生又靚仔，佢仲鬼咁鍾意許冠傑d歌，隨口都可以講得出邊隻歌係幾時出同響邊張碟度，阿Sam去東南亞登台佢會坐好幾個鐘頭車去捧場，佢都可以講得係阿Sam o既超級歌迷咯。佢見我地係香港來客，仲專登播阿Sam d歌出黎助下慶添。

傾就係幾好傾嘞，之但係佢介紹o既菜式就認真麻麻啫！我地一早都領教過，香港人響新、馬一帶食海鮮都好難有乜驚喜，不過見佢實牙實齒話黎到呢度一定要試下佢地o既「怪味蝦」喎，問過價又唔係太貴，又即管試多一劑。

到果兩隻蝦上枱果時，見賣相都仲算唔錯，以為今次會跌眼鏡啦，但係一放到入口，就知道仍然係無乜料到，碟蝦淨係得個樣，至於蝦應有o既鮮味就蕩然無存！又係正一流嘢！多口問下個靚仔老板d蝦雪左幾耐，佢笑下話個零禮拜啦！我相公連隨潤左佢一句話，響香港雪得一個禮拜o既蝦，通常都會掉入垃圾筒咯！佢好尷尬咁笑下就行開左嘞。

呢餐食左馬仔一百過外，但係水準就完全唔係波！經此一伇再次證明：海鮮，都係留翻返香港至食啦！