新馬兩頭行 (10)

D10  吉隆坡

 

黎到第十日，今次新馬探親行程已經接近尾聲，玩埋呢兩日吉隆坡就要返落新加坡，響表姐度再住多兩日，就要坐飛機返歸咯。趁住呢兩日逗留吉隆坡，除左再住下呢間五年前住過o既酒店之外，當然仲要去行下呢度o既地標-雙子塔啦！我仲好掛住雙子塔樓下果個好大o既商場，佢係我預計行程中必到o既地方之一，聽講呢個禮拜仲做緊大減價添，咁就唔好再等咯，起程…

 

呢間酒店雖然話經過裝修、改名、起價，但係d房都仲係好舒服o既

 

而且窗口外面仲一眼望倒晒吉隆坡兩大地標，即係電視塔同雙子塔。講高梗係雙子塔高啦，但係電視塔近我地一d，所以睇落就好似電視塔仲高d囉

 

酒店包埋早餐，雖然都唔係咩矜貴嘢，但係食物水準都算得幾好，而且餐廳有兩個服務員生得好鬼標緻，佢地個樣又成對孖公仔咁，我想搵齊兩個一齊影，但係人地有嘢做唔係咁得閒，只可以搵倒其中一個同我影，呢個就算唔出聲，淨係對眼都電到人暈得一陣陣

 

食完早餐就行下附近唐人街o既老牌購物地點Central Market

 

呢度d鋪頭雖然細左d密左d，但係勝在品種繁多又可以講價，都行得下架

 

行完Central Market，就要搵餐晏仔食下先。五年前幫襯過o既雞飯檔依然健在，又入去重溫下久違左o既美味靚雞先

 

呢檔嘢d出品仍然能夠保持相當高水準，d雞好味得黎又夠滑，不枉我地五年來對佢念念不忘

 

呢餐加埋飲品總共都係29蚊馬仔，一d都唔算得話貴

 

而且我地仲係五年前響呢度學識新、馬一帶o既食雞文化：食雞飯要指明要雞二度，咁就唔會下下都食倒雞胸肉嘞！

 

食完好味雞飯，再四圍行下買d手信，無意中又俾我響超市以11個幾買倒特平o既怡保白咖啡，折翻港銀都係廿零蚊一包，比響香港買足足平左一半有多，宜家仲有d後悔當時無買多幾包！攞左d戰利品返酒店，下晝就走入地鐵站，直向KLCC進發

 

吉隆坡地鐵站同香港果d分別不大，而且成個網絡四通八達，搭起黎好方便

 

話咁快就黎到雙子塔嘞

 

呢個商場有好多層，要行勻晒都要花唔少精力

 

相公每逢黎到呢d地方就例牌無乜電，佢話想響地下d椅度休息下，就由得佢睇人砌聖誕樹，我就出動去四圍博殺下先

 

唔經唔覺又過左幾個鐘，響我來回搜索之下，卒之俾我掃左幾對又平又抵o既鞋，宜家可以坐低嘆翻杯Moca咯

 

Starbucks仲對住個噴水池公園，d水又噴得幾好睇喎

 

行完一輪有d肚餓，經過食攤又搵d嘢食下先，不過呢度d那沙就麻麻地啫，相公叫果碗紅豆沙仲甜到食唔落添，總之就唔啱口味啦！食完呢碗那沙仲俾佢滯到我連夜晚果餐都無晒胃口添！

 

行下買下坐下，一日好快就咁過左嘞

 

日落黃昏，d回教建築物響夜幕低垂之下都幾有味道架

 

我行左成日，到坐車返酒店果時，都攰到無晒電咯！