陪老爺巡視華東(5)

第五日 ： 上海(城隍廟)

 

不經不覺出左黎五六日咯，阿星放唔倒假今晚就要返歸，所以都唔去得邊度，淨係下晝去左城隍廟附近行左一陣就返黎，今日算係休息吓啦。

 

 

大老爺出黎玩就鬼咁早醒，今朝又係五點就起左身，落左樓下附近晨運……

 

應該話係睇人地晨運至啱！

 

我地住果度樓下就係新天地附近，呢度幾排石庫門舊屋好出名，係旅行團必到o既景點之一，其中右手面呢間仲係國內團o既必遊點，因為佢係中共一大開會o既地點，對佢地黎講特別有意義

 

朝早係咪d花都靚d呢！呢種花內有花o既品種幾特別喎！

 

水池側邊悠閒自在

 

街邊賣古董公仔o既鋪頭都仲未營業，但係呢d好有民革色彩o既公仔，就一早已經個個精神抖擻嘞

 

大老爺o既早餐 — 小籠湯包，每籠四蚊

 

出年五月上海攪世博，宜家全市周圍都加緊宣傳，呢一組響公園門口o既公仔又幾有綠意喎

 

到左老爺返黎同我地再落樓果時就好猛風，我地樓下小花園o既樹都吹到搖風擺柳

 

今晚阿星就要返香港，所以無咩行程，大隊淨係諗住去城隍廟附近行下街。阿星離隊最依依不捨o既係大老爺，因為叮噹一號走左之後，佢就順理成章頂上變成叮噹二號

 

呢度d古舊建築都幾別緻架！

 

城隍廟香火鼎盛

 

響鬧市之中o既名剎，同孤山野寺係兩個完全唔同o既修為世界

 

上海城隍廟之所以咁出名，好大部分係因為佢周邊林林種種小食帶出黎o既為食效應，呢個大漢正在響街邊製作緊花生糖

 

行完城隍廟，大隊返左酒店休息，我仲買左湯料煲左一大煲節瓜湯俾大家飲。黃昏時分，成隊人連埋主人家o既代表Cola小姐一齊出去搵地方食晚飯，因為要就阿星順路出機場，所以我地就響地鐵漢中路站摸左出黎搵食，點知呢度附近無咩食肆，結果我地入左一間平時一定唔會主動幫趁o既酒店餐廳，但係又出奇咁令人滿意喎！呢餐我地五個人點左十幾樣野，大部分水準都非常好

 

呢個扣肉飯係酒店特別推薦，大老爺猛讚話正！

 

生煎包黎果時個個都已經飽左七成，但係佢煎得實在出色，香口得黎個包又保留倒有肉汁，所以仍然咁搶手！

 

呢餐四百三蚊真係非常超值！又要多謝上海主人家請我地食左一餐咁滿足o既晚飯！

 

響大家都捧住個肚嗌話好飽o既時候，服務員又將呢個蒸蛋放響我地枱面，當大家都話佢上錯菜o既時候……

 

大老爺至如夢初醒咁話……真係有叫到呢個海蛤蒸蛋喎！咁……食得唔好嘥，又掃埋佢啦！