第9日 ： 蘇州 (七里山塘、獅子林) — 南京
今朝我地一早就將d行李寄存響櫃面退埋房，跟住去食早餐，賓館隔籬就有間大娘水餃d野好似唔錯，但係佢要到8點至有野賣，仲要等成半個鐘，結果我地唔等佢，行左去幫趁永和豆漿。
食完早餐，又俾大老爺響附近搵倒架車，講好價包車200蚊一日，個帥哥司機同尋日我地遇倒o既司機又係另一款，佢已經載住我地起程，但係佢仲猛咁遊說我地話，跟一日團抵過我地自己逐度摸去玩喎，佢仲寧願蝕埋油錢車我地去跟團添，自己有生意都唔做，都唔知佢地係點打算o既！聽佢講跟團每位130蚊睇七個景點，聽落又唔錯，又信佢一次。
佢載左我地去七里山塘插隊入個團度，其他團友已經響度遊得差唔多，我地睇左一陣就跟翻大隊出黎。
九點幾去到蘇州名園獅子林，呢度好多人，我地都係跟住人流巡例四圍行左個圈。既然跟左團就可以叫導遊幫我地訂火車票，結果買左今晚5:56去南京o既快車。
十點幾出翻黎，跟住話去遊船河，隻船都係沿住古運河駛左成個鐘，都無咩特別，係個船長響行船期間攪氣氛表演楝篤笑幾熱鬧吓。
中午落左船，個團就近響寒山寺附近食飯，但係話得半個鐘至喎，我地拿拿聲去左對面馬路間飯店仔點左幾樣野，求求其其又攪掂一餐。
食完飯下晝入寒山寺，呢間寺因為有楓橋夜泊呢首詩，所以成為名剎，響日本尤其出名，好多架仔專誠黎呢度參拜。
跟團少免要參觀下絲綢廠，我地又跟人入去遊個圈，出黎之後行行下車，個導遊忽然指住個塔話呢度就係虎丘嘞，睇翻行程表，原來虎丘呢個行程係遙望o既喎，咁又算係一個景點！遙望虎丘之後，最後去埋報恩寺塔個團就解散。我地因為要去火車站，所以呢度都無落到去睇添。
同團有七個上海巴辣姐妹，佢地加埋相信都有500歲，但係就嘈喧巴閉得好緊要，真係頂佢地唔順！另外坐我地附近有一男四女，係海南島公司出差南京順便黎玩o既，佢地又係今晚去南京，仲同我地同車卡添。
五點幾散團，架車送左我地去火車站，車站好多人，好彩火車準時開，但係就響中途行下停下，結果誤點左成個鐘至到南京，落車已經係8:30，個個都好肚餓。我地跟住果五男女坐地鐵，去到珠江路站我地出左黎地面，撞下撞下入左呢間野馬飯店食晚飯，呢度d獅子頭好正，生菜包又掂，整體黎講水準唔錯，我地響南京夾夾埋響度食左3餐。
呢個小籠包早餐唔錯架
大老爺今日響路邊搵左呢架車載我地，200蚊一日幾抵喎。但係個師哥司機寧願將我地三隻羊仔賣俾d一天團，自己有生意都唔做！一天團收晒都係130蚊，你話佢地可以賺得幾多中介費呢吓？
我地中途插團，黎到七里山塘人地都已經遊得七七八八咯
睇幅導遊圖呢度應該都可以行得下喎，但係可惜唔夠時間丫
時間緊迫唯求其望下其他展品先，呢個公仔原來係一篇文章黎o既喎
呢度仲有唐伯虎寫o既詩添
呢個大墨硯除左裝飾之外唔知仲可以要黎做乜呢
據記載話康熙同乾隆兩爺孫好鍾意呢度，次次下江南都要黎下喎
唔知佢地鍾意呢度d咩呢？
唔通係鍾意鬥蟋蟀？
抑或黎觀花問柳呢？拜祭十二花神係江南特有o既風俗，紅樓夢入面都時不時有提及到
響七里山塘入面行得一陣就要走咯，跟住就黎左蘇州名園之一o既獅子林
呢度係就係幾靚…
不過人就多左d啫！
其他o既景點都無咩好睇咯，上左去南京o既火車，又遇翻我地今日o既團友，佢地一男四女係由海南島黎南京出差o既，順路又四圍玩下喎，咁又幾好喎！
黎到南京已經八點幾，要拿拿聲搵地方醫肚先，今次俾我地誤打誤撞左入黎，呢間野馬飯店o既水準的確唔錯！為左呢味獅子頭，大老爺先後黎左三次
呢款生菜包又好掂，廿幾蚊可以包得倒十幾件，味道又幾好吓添！
茶樹菇仲係揀手貨，份量又夠，抵讚！
加碟青菜添，呢餐又食得好滿足咯！都係105蚊咋，人均消費35，梗要再返黎食啦！
