奀豬師太 Blog: 陪老爺巡視華東(8b)

第八日：蘇州 (太湖)

響林屋古洞捐左一個鐘頭之後，行翻出黎個司機就車左我地去太湖邊一間飯店食下晝飯，我地上到去見呢度環境差左些少，就落樓行過隔籬幫襯第二間好樣些少o既，夢夢響度叫左4隻大閘蟹，呢度d蟹睇黎靚過陽澄湖果d，我地另外又要左一隻土雞，但係厨房又係要黎整落湯雞，咁o既食法麻麻地啫，另外仲有銀魚炒旦同紅燒昂刺魚，呢餐有魚有蟹，食左280都差唔多啦。我地響樓上仲影倒隔籬果間飯店個阿嬸每碟蒸魚都試下味o既場面添！

食完飯古惑司機再車我地黎另一個收費景點石公山，入場又係每人50，呢度可以沿湖望下太湖景色，仲可以上山睇遠d，但係我同夢夢都懶得爬上山，所以入到黎都係響湖邊行左一陣就算咯！

兩點幾行返出黎搵翻個司機去第二度，佢話未開得車住，仲要等跟車黎果兩個人，但係佢頭先食飯果時專登行入黎報告話，已經俾翻錢果兩個人打發佢地走，宜家我地返黎架車度，又見佢地d行李仲響架車入面，仲要我地浪費時間等佢地添，呢個古惑友真係前言不對後語！佢d古惑招越黎越難自圓其說！我地就同佢講，我地包左車唔想再花時間等佢兩個，佢同時食兩家茶禮，響我地強大壓力之下無咩辦法，只好另外搵第架車載我地走先。但係呢個新司機唔多在行，大老爺同親佢講地圖上o既景點，佢度度都話唔識路，攪到無晒去玩o既mood，嬲嬲地就叫佢載我地返入市區算鬼數。

四點幾五點返到入市區，大老爺諗住去虎丘行下，但係條友放左我地響定園，我地以為都係虎丘附近就是鬼旦，但係後來發現又唔係喎，既然黎到定園門口，就入去睇下啦，入場又係每位50。

呢度開到六點，我地入得黎遲，已經成五點好多度都趕緊收工，我地結果連門券包埋o既茶館試茶節目都趕唔切去添，淨係跟住個靚妹導遊係咁意行左個圈，響裏面居然又發現有氹人拜神拜佛o既低劣技倆，都唔明d大陸人一講到拜神就咁易俾人呃，真係四圍都滿天神佛！

行得大半個鐘我地就出翻黎，跟住個司機載我地去搵賓館，呢個時候至發覺原來呢個司機都幾盡責下喎，佢頭先應該唔係為左慳時間專登扮唔識路唔載我地去玩o既。呢個時候佢載左我地去一間門面幾光鮮o既賓館門口，通常響呢個時候佢就可以收錢放工走人，但係佢都不厭其煩咁跟出跟入，跟埋我地行左幾座樓，上樓落樓同我地打點搵人睇房，都算唔話得。響呢度我地睇啱有個三人間，雖然房租三百係貴左些少，但係都諗住響度住嘞，點知呢個時候個帶睇房o既妹妹見我地用回鄉證，至話呢度原來係唔夠規格招呼港澳同胞o既喎，乜原來到宜家仲有呢支歌仔唱架！人地唔可以破壞規矩招呼港燦，都無咩佢計，唯有又去搵過第二間啦！個司機又要再開車載左我地返去尋晚住開果間，呢度又好生意到住滿人無房！結果我地行左去後面街一間比較高檔o既新華酒店，睇啱一間三人房450，住落就落樓搵飯食。

呢度對面就係食街，我地搵啱一間飯店仔上左二樓，呢度地方窄d，我地要左炸大排骨、百合蝦仁、炆肥腸、生菜，水準都係普普通通咁啦。

食完飯返上賓館，上到去發現個房完全現無冷氣，搵人問過，佢地話今日天氣唔夠暖係唔會開中央冷氣o既喎，夢夢幾大都唔放過佢，擾攘一輪之後，結果攪到要退房走人，落到樓下服務台退押金果時又話要扣我地一百蚊，大老爺梗要上訴啦，結果個女經理同意全數退錢至算數！結果行多一輪至響間相當平o既大蘇賓館住左落黎。