陪老爺巡視華東(7b)

第七日 ： 上海 (大觀園，朱家角) — 蘇州

 

包括大老爺在內，大家都唔知肥仔司機原來仲有一個靚女拍檔o既喎，到我地上車至發現，跟車一齊去呢位紅衣女郎係我地 o既免費導遊，若果俾大老爺一早知道，可能會俾800蚊包車都未定！呢位紅衣靚女我地初初以為佢同肥仔司機係夫妻檔，後來問下至知唔係喎。

肥仔一開車就話時間都幾趕下，原來佢怕回程塞車，後來證明佢o既擔心係好正確o既，佢問清楚我地今晚7:50係要坐火車去蘇州，就應承話最遲七點送我地返到黎。又話我地應該帶齊行李一齊上路，咁就唔洗走咁多回頭冤枉路咯！正式起程，順風順水架車都行左成個鐘至到大觀園，點半去到大觀園門口，正票60蚊位，肥仔爭住同我地買票，心知肚明佢用導遊證可以賺一半價位，都俾佢賺啦，橫掂都係已出之物。

 

先響大觀園門口同紅衣導遊影翻張相先

呢個人物圖好似簡單d喎

叫得做大觀園，裏面d建築物自然係依足紅樓夢黎命名啦，但係呢個「太虛幻境」會唔會簡單左d呀……

 

呢幅圖又有突出表現，俾阿星黎到一定又會手多多搣人地啫

「曲徑通幽處」化學左d喎

「怡紅快綠」，咁快就黎到寶哥哥屋企

 

唉！若果「怡紅院」真係咁款，我相信好多人都唔會再睇紅樓夢咯！

裏面亦都無咩陳設，只係掛左幾張畫黎呃神騙鬼！

「絳雲軒」整到成間鋪頭咁！點掂！

 

「瀟湘館」直頭老實不客氣，就係賣紀念品o既鋪頭！

連「千紅一窟」都出埋！跟住落去都無咩好講咯！

「瀟湘館」後面有個水池，呢邊就係咁o既

另一邊就係第二個款

 

 

 

 

大家睇左咁耐有無發覺點解連一個遊人都影唔倒o既？唔係我地刻意避開唔影，真係根本就無遊客！我地逗留左個半鐘，只係遇倒兩批人，一批五個，一批兩個，5+2+3總共十個人入場，咁o既場面唔知捱得幾耐呢！

 

反為行返出黎收費區，呢度d花仲靚d添！