陪老爺巡視華東(11a)

第十一日 ： 南京 (甘熙故宅、鄭和公園) - 揚州

 

今日食完酒店送o既早餐，就坐地鐵去今次o既目標「甘熙大宅」，響張府園站落左車，行左一輪黎到熙南園，但係都見唔倒我地要搵o既「民俗博物館」，問下企響路邊o既食蕉哥哥，佢指一指我地行黎o既路口，話一轉彎就係，真係唔開口問下人都搵唔倒添！

甘熙大宅係一間民間博物館，20蚊門票，d野都叫做齊齊整整，我地首先行入戲台果便，呢度係一個小戲台連茶座咁既格局，我見四圍無人就走上台扮下野，點知茶座櫃枱下面忽然捐左個人出黎制止我，真係俾佢嚇左一跳！

博物館入面有好多民間手工藝展攤，每一檔都有一個師傅級人馬坐鎮，但係遊客又唔見得話有幾多個，睇黎呢d生意都好難發倒達！呢度d展品中以祭花神習俗對我地南方人黎講比較新鮮，紅樓夢裏頭曹雪芹曾經多次提及呢種響江南特有o既風俗。

睇完甘熙大宅，跟住再去邊度大家都無咩主意，大老爺睇完一輪地圖，就搵左架的士載左我地去唔係好遠o既鄭和公園，呢個公園好細，而且就咁望下好似同鄭和無咩關係，最後俾大老爺問倒人話隔籬係有個鄭和紀念館喎，但係摸到去門口都係要食閉門羹，唔知係咪全部去晒食中午飯！無辦法唯有影左幾張七下西洋o既簡介就走人啦。

入唔倒鄭和紀念館，就響公園隔籬間江蘇飯店食晏啦，呢間飯店係一間賓館o既附屬食店，望落規模都幾大下，有幾十張枱，但係坐底點菜就叫四樣無三樣！唔怪得全場都淨係得兩枱客啦！求其叫左幾樣佢話有o既，都只係炒鱔糊比較好些少，鹽水鴨都仲算可以，埋單130。

食完飯返酒店攞翻d行李，再坐的士去汽車東站，今次因為怕左同人搶買高速火車票，所以改坐汽車去揚州，去到即買即開，舒舒服咁向揚州進發。

 

甘熙大宅入面呢個小戲台幾骨子下，我都上去踩過台板架！

 

 

以前呢度係d官員o既花園，宜家改左做民俗博物館

 

 

 

民俗博物館入面有個藏書樓，重修果時整左呢個碑記

 

入面有好多小型展覽，呢個係其中o既鐘表展

 

除左古老鬧鐘之外，仲可以學下時辰對照添

 

噫！有野玩喎！

 

燒炮仗呀！

 

好驚呀！

 

有d展板介紹過年歇後語，應節噃！

 

接財神啦！

 

又有剪紙藝術，但係就無咩人幫趁囉！

 

呢d舊民居起得幾似喎

 

之後黎左鄭和公園

 

鄭和就見唔倒，只係見呢個妹妹響度呃我地d糖食

 

鄭和紀念館日光日白都關實度門

 

唯有影下佢門口呢d簡介啦