兔年春節新馬遊(11)

食完下晝飯我地就買船飛過去邦咯島，去到售票亭見倒個好得意o既現象，但見三個窗口仔分別伸左三隻手出黎招客，其實佢地賣o既票都係一樣o既，但係就分屬唔同公司，後來了解，呢d都係因為早期有三間公司經營開唔同航線，到後來航線統一左，但係公司就各自經營，所以就留底呢個怪現像。

買好20蚊來回票就去排隊上船，我地本來係排第一，但係上船之前因為我叫老爺同我影兩張相行慢左兩步，上到去船o既上層，果幾行靚位就俾一家人用d什物全部霸晒，真係霸道得緊要！有華人o既地方就有呢d羞家現象！老爺都費事同佢地爭，行左出去甲板諗住企一陣就到，但係企企下又熱又多人，老爺卒之頂唔住，要逆人流而入，響船o既低層搵左兩個位坐，佢仲要情商隔籬果位傷殘人士幫眼望住兩個位，佢至行返上甲板叫我落翻去坐。

坐得十分鐘左右隻船就埋岸，我地坐響下層唔知頭唔知路，人地上岸我地又上，上左去至知碼頭呢度係本土人住o既村落，無咩遊客黎兼且又好少的士，我地罰企左一輪，卒之有個的士哥哥開工，佢話收15蚊載我地去一間叫做Carol Bay酒店度投店，呢間酒店唔係響正沙灘側邊，要出沙灘要行百零兩百公尺，但係相對房間就濶落d，190蚊都算唔錯啦。

黎到島上無咩好做，就只有四圍行下，好彩島上仲可以保存倒大自然氣息，遊人都仲可以有眼福睇倒d大咀雀犀鳥周圍自由自在咁飛。

下午時份天氣鬼咁熱，我就返酒店瞓一陣先，老爺唔怕晒自己四圍貢，我瞓完覺等涼d至同佢行，行行下入左隔籬無幾遠o既Sandy Beach酒店，我好鍾意佢個名，見價錢差唔多地方又幾新淨，就訂左房聽日搬過黎住。

夜晚同老爺中左入去椰香飯店食晚飯，因為新春關係，呢只係做d過年菜式，不過食落都仲算幾好，呢餐食左60蚊，個面包炸蝦丸唔錯。

紅土坎都係本地人o既渡假地方，但係水質就麻麻地啫

邦咯島碼頭上同落都係果度，秩序有d混亂

老爺就因為要影兩張相遲左，所以排第一都俾人霸晒d靚位

沙灘對面呢個小島有個高檔渡假村，係高消費地方

我地呢便就平民化d，有好多台灣後生仔黎自由行

 

我地今日住o既Carol Bay酒店露台望落黎，大自然氣息都仲算唔錯

右面望翻我地黎果便

左面就望出沙灘，見倒些少海，都勉強可以叫做海景房架！

話望海就攪笑啫！但係望日落就無得頂嘞

夜晚摸左入黎呢間椰香飯店食晚飯，水準都唔錯喎

蛋王肉餅整出黎咁款，不過都幾好食

面包炸蝦丸好正

埋單60，都算可以