兔年春節新馬遊(7)

尋日響落腳o既馬來西亞酒店順便報左個一日團，每人55蚊馬仔，兩個人維起黎都唔洗300蚊，包一餐午餐，咁今日就唔洗自己四圍撞，一於跟住人行就得咯。

呢個檳城一日遊由朝早十點半開始，行程係去幾個大路景點，會有車黎酒店接我地，到左時間落到大堂，黎接我地o既林先生帶我地上左架私家車，我初初以為係駁腳車黎，問下原來十點半就係得我地兩個人，兩人成團喎！呢樣野令我即時諗起老爺o既大連事件，即刻打醒十二分精神，不過，唔係次次都運氣咁差o既，今次就遇倒好人嘞，雖然得兩丁客，林先生都好盡責做好佢帶團兼司機夾導遊o既工作，絕無欺場，佢帶我地去左臥佛寺、極樂寺、土產店等等，下晝食飯仲有蝦同魚塊加一碟菜，菜式同水準都尚算可以接受。

下晝行程本來係去荅荅娘惹博物館，因為我地上次去過，呢度就算要去都可以自己行過去，所以我地叫林先生載我地去周姓橋放低我地，臨走老爺見佢咁盡責，仲醒左廿蚊俾佢，幫補下等佢唔使咁齋啦。

第一站黎到極樂寺

其實佛寺我地兩個都無咩興趣，黎到又即管行下啦

好多燈籠喎！唔知要幾錢掛一個呢？

呢度啱啱整好個觀音像，要坐纜車上去喎，每位兩蚊

查實幾步路唔坐車都得，就係一眼望晒咁遠

上到黎主要就係睇呢個新整o既觀音像

老爺上到黎唔去睇觀音，反為去探下個friend先喎

好彩我都有啫

 

呢兩隻狗仔眼睩睩幾得意

 

呢個金剛o既眼神就唔講得笑！

 

佢響度睇住個場幾有氣勢！

 

有怒目金剛睇場，香火梗旺啦！

 

點波羅燈又係講金唔講心

 

呢d祭品唔知食唔食得呢下？

 

兩蚊坐車上到黎，睇埋呢塊碑至好走呀！

 

跟住林先生載左我地黎植物園，呢d花好似西蘭花咁，唔知可唔可以炒豬頸肉呢？

 

呢棵樹d花就響樹幹度生出黎，幾盞鬼喎

 

聽林先生講，呢度o既地主係呢d馬騮，千祈唔好得罪佢地添喎，唔係分分鐘要留下買路錢！佢地會搶野架！都係等老爺同佢地溝通易d嘞！

 

再落黎林先生同我地黎左緬甸佛寺

 

聽完講解，至知呢d龍都有種族分o既喎，有尖角呢d係緬甸族o既，中國龍係丫叉角o既喎

 

寺入面呢尊臥佛最出名，好多人黎求佢保佑架

 

點樣求法？咪用呢d油燈囉！

 

呢d都得

 

大盞d梗係平安d啦！

 

呢間佛寺好有世界觀，地球儀都有一個

 

行完呢度我地就去食午飯咯