新馬兩頭行 (11)

D11  吉隆坡-新加坡

 

到左第十一日，呢次馬來西亞行程剩低兩日就全部完畢，今朝食完早餐就唔再四圍去，響酒店瞓多一陣，跟住過去隔籬車站買好返新加坡o既車飛，疊埋心水等下晝坐車返去。

 

酒店食完早餐，響大堂影多張相就走人

 

等到中午，就過車站買好車票。車站入面仲有一檔好正o既雞飯，行過路過，當然唔好放過，又幫趁佢食多一餐，食完仲要買起佢隻無脾雞(點解無脾，因為俾我地食左囉)，帶埋上車食

 

相公今次卒之肯揀架靚車黎坐，呢種草原快車雖然比其他公司o既車貴些少，但係就物有所值囉

 

點值法？佢o既座位除左比較闊落之外，仲有私人熒幕，可以揀歌聽、揀戲睇，仲有電子遊戲玩添！

 

相公選擇聽歌, 我就揀左兩套戲黎睇，所以呢六個鐘車程話咁快就過左去，都完全唔覺得悶 (但這不是我的腳喎!)

 

而車外面o既高速公路仲同場加映反車烈熖，場面都幾刺激，架車燒到四圍都係黑煙，認真利害！

 

經過公路小休站休息o既時候，想話買d零食，但係相公已經將d馬仔全部換晒新仔，搵勻都係得翻 一兩 蚊，變左蛋家猪見嘢無得食

 

攪到幾乎想同呢個同車泰馬靚度住多少黎買嘢食添

 

一直等到天都黑晒，先至返到新加坡，再坐車返到表姐屋企附近，拿拿聲光顧呢個大排檔食咖哩雞

 

因為肚餓得滯，所以食完晒至記得影翻兩張清倉照片