陪老爺巡視華東(7a)

第七日 ： 上海 (大觀園，朱家角) — 蘇州

 

 

響上海留左五六日，都開始有d悶咯，但係大老爺o既朋友尋日又力邀我地留多一日，咁就今日去玩埋上海近郊兩個景點，今晚至坐車去蘇州，繼續今次o既華東行程啦。

 

大老爺照例又係一早起身，今日好d路喎，瞓到六點至醒，佢又係一早落街四圍行，今朝俾佢睇倒呢度特級上海美髮，裏面d項目都估唔倒係乜？你又知唔知咩係收費53蚊   o既洗頭修面游泳式丫？佢地又點樣收40蚊同你穿耳環呢？又點樣至算係營養倒膜呢？

 

上海有d樣板街都打掃得幾乾淨架

 

有d天橋起到八樓咁高，又左穿右插，比香港仲加利害，呢一組天橋分工好精細，人有人行，車有車走

 

新天地附近樣樣都執得正d，連街道都企理過其他區

 

建築物就梗係靚d啦

 

唔覺意四圍行，就搵翻尋日搵極都唔見o既小南國嘞

 

我地前幾日幫趁過o既新吉士，夜晚想搵個位都難，朝早就休閒好多

 

附近響夜晚好有情調o既酒吧街，朝早又有唔同睇法

 

街邊兩旁o既法國梧桐響冬日紛紛減輕負擔，所以成地都係呢d咁靚o既五色落葉

 

呢套衫當街晒晾出黎，係咪好有型呢！

 

上海人食o既早餐都好多花款，呢d 餈飯好多人鍾意食

 

葱花煎餅又係另一款佢地o既至愛

 

仲有生煎包都係

 

燒味就好似無廣東d咁吸引咯

 

係咪色粉用多左呢？

 

生意幾好下喎，一大清早就吊晒咁多隻鴨出黎

 

到左9點幾大老爺返上樓，我地啱啱起身，攪得黎落樓退房之後，就坐地鐵出火車站，先將三個背囊寄存響地鐵出口d鋪頭仔度，然後去買蘇州動車(高速火車)票，又係同樣情況 — 無票！提早成半日黎都買唔倒，真巴閉！行出門口見有人炒飛，唔怪得無飛賣啦！多數係俾呢d黃牛黨買晒黎炒！無咩計又試下幫趁佢地一次咁多，買好飛就可以開始今日o既行程嘞。

今日係諗住去市郊o既大觀園，尋晚阿星響香港俾料話要去體育場附近搵車，咁我地就上左地鐵3/4號線，兩條線大部分o既站都係相同o既。攪左一輪，卒之黎到體育館，阿星d料話落左車再前行100米就見喎，但係我地行極都搵唔倒有似樣o既車噃，我又肚餓咯，就同夢夢入左永和豆漿食d野先，大老爺再去搵車站。

我地響永和坐左一輪，大老爺返黎報告話前面係鄰近旅遊點o既集散車站，但係所有車都o係朝早十點左右開出晒，宜家12點基本上無咩車再出！大觀園最遲o既車就係開10:10。但係佢卒之都搵倒個肥仔司機，可以用400蚊包架車去大觀園，仲話可以送埋加遊水鄉朱家角，同教我地點樣響朱家角逃票添，既然諗唔倒有咩地方好去，咁就殺佢啦。

 

宜家十二點，一定要食左飯至去玩，於是就一齊入左呢間豪享來餐廳先食個午飯至起行，大老爺要左個魚柳餐36蚊

 

 

我就要左兩個點心，夢夢要炒米粉，食好就起程去大觀園玩嘞