陪老爺巡視華東(7c)

第七日 ： 上海 (大觀園，朱家角) — 蘇州

 

行完無咩好睇o既大觀園，就行翻出黎搵肥仔司機，佢響架車度瞓緊晏覺，紅衣導遊叫醒佢，就開車送我地去加遊o既水鄉朱家角。車程都係約莫行左十零廿分鐘就到嘞，紅衣導遊帶我地經過d民居左兜右兜就兜左入去景區，唔洗俾門票。

呢度同烏鎮大同小異，又係一河兩岸大把鋪頭賣記念品，但係賣小食o既就多左好多，遊人反而就少d，可以慢慢行下。小食好多款，尤其係d肥猪肉成街都係，我地都買左廿蚊，有成十幾舊。

響度遊左大半個鐘我地就返坐肥仔架車返上海市區，回程真係幾塞車下，肥仔手車又都幾辣，搶位永無蝕底！好彩佢預夠時間，我地返到市區都未夠六點，佢放左我地響間哈爾濱私房菜門口就拜拜咯。呢度係食餃子o既，我地叫左兩款水餃之外，仲有個松子小黃魚都唔錯，埋單一百多d，相當抵食，連埋我地頭先買左果包肥豬肉攞埋出黎加料，但係肥豬肉凍左就差好遠咯！

呢間野d服務員非常麻麻，十叫九不應，最後想問下路點樣行出火車站都無人理，卒之都係櫃面個阿姐積極d，佢行到出門口指住個方向話：「15分鐘一拐就到！」，我地就跟住行啦，但係越行越黑，實在唔多對路，再問下其他人，問倒個阿叔佢擰下個頭，建議我地不如坐車過去，再問另一個阿閃，佢話「有得走！」咁就搵車坐啦，但係巴士站又無架車去火車站，落班時間千辛萬苦上左架的士，都要跳左幾次表行左成10分鐘至到，食店個阿閃又話「一拐就到！」行死人咩！

到左車站，又係例牌好多人，氣氛好緊張！但係火車就好快，半個鐘左右就到左蘇州，住落就落街行左入食街望左一輪。天氣明顯轉涼，睇電視話聽日會降成十度喎！行行下街有個面包的司機「漏」我地跟本地團，呢度四圍都有人sale本地團，唔通好好賺！見呢個哥哥談吐都幾老實下，又問下包佢架車要咩價錢，佢話包晒成日220，聽落又好抵喎，又攞定佢張卡片備用先。

 

 

紅衣靚女帶我地左兜右兜，兜左入黎景區，成功逃過門票一關

 

朱家角同烏鎮o既格局差不多

 

都係一河兩岸

 

呢度食野o既地方有好多

 

呢d蚌唔知點食法呢下？

 

沿街兩邊都有唔少鋪頭賣旅遊記念品

 

毛伯伯都有得賣

 

醃製品有大量存貨

 

阿婆糉響呢度好出名

 

有間鋪頭宣稱話一日賣一萬隻喎！

 

但係講到最好賣，應該係佢佔第一位！

 

因為單從賣猪腳鋪頭o既數目黎睇，應該以佢最巴閉！隔三五間就有一間，數埋起碼有十間過外

 

豬腳咁大隻驚食唔晒？唔怕，佢有d細細舊五花扎肉

 

明碼實價，每件兩蚊，仲買五送一添

 

嫌豬肉肥得滯？可以幫趁滷水蓮藕

 

 

 

再響度飲埋蔗汁影埋相，咁朱家角又遊完咯！

 

時近黃昏，連d船都收工咯！

 

靚女都等住返屋企食飯

 

我地今餐無飯食，只係食水餃

 

呢間哈爾濱私房菜o既苦瓜西芹炒蝦球都唔錯

 

大老爺最鍾意呢個松子小黃魚，一啖一條，連骨都趙埋