陪老爺巡視華東(8a)

第八日 ： 蘇州 (太湖)

 

今日起身都係諗住去太湖玩架嘞，尋晚問過個面包車司機話220蚊包一日車，仲實牙實齒話無其他附加費，於是今朝就打電話俾佢。溝通左一輪價錢無變，但係佢話佢今朝唔得閒，要搵過第二個司機黎接我地，我諗下又無咩所謂，就應承左佢。

等埋佢兩個起身，響酒店食左個好普通o既早餐，跟住就落樓等架車黎接我地。九點左右，呢個戴頂帽仔o既司機就黎到，佢個樣細細粒粒，講野好圓滑，同佢講咩佢樣樣都應承話無問題，同尋晚果個完全係兩個款。

一上車佢就話要接多兩個人一齊去太湖，我初時覺得橫掂有位，方便下人就接埋佢地啦。

佢地一男一女，自報話係湖北人，睇黎係情侶或者夫婦卦，佢地同個司機好合作，一齊作好晒故仔，話晏左跟唔上團所以坐我地順風車去太湖，見佢地個樣唔似惡人，就是鬼但啦。事後至知佢地都係自由行，可能呢個古惑司機收佢地平d(可能100蚊)，所以佢地迫埋我地架車都肯制。

十點零架車去到太湖邊橋頭「太湖山水間」呢個地方，個司機放我地落去行一陣。呢度似係一個新開發o既景點，係一個花園咁o既地方，有個湖邊茶座都幾骨子下。四圍行左一陣，影左幾張相就再上車。

過左條橋，黎到呢個叫做縹緲峰o既島仔前面，個古惑司機介紹話碧螺春係產自呢一度喎，都唔知信唔信得過！岸邊有d快艇載人出去遊船河，收費當然唔平啦！遊晒西山島要成千蚊，利害！

跟住佢車到我地去到林屋古洞，話係「天下第九洞天」喎，佢推介我地入去行下，無他o既，每人50蚊入場費，佢又可以從中賺翻一筆！裏面又係一般o既地下融洞加埋d燈光效果，睇過桂林果d呢度就唔洗睇咯，不過一場黎到點都係要入下去o既！

 

 

酒店送o既早餐都唔可以有咩要求咯

 

黎到太湖，第一站係「太湖山水間」

 

呢度係太湖大橋o既起步點

 

似唔似澳氹大橋呢吓

 

太湖o既水

 

呢個湖邊茶座幾骨子下架

 

影翻張相先

 

過完大橋回望

 

呢便就係縹渺峰景區路喎

 

呢個咪就係縹渺峰囉

 

 

 

呢度有d快艇載人遊船河，但係就貴得利害！

 

跟住個古惑司機就載我地黎呢度，林屋古洞每位收50

 

話係天下第九洞天喎

 

中英對照o既簡介

 

又影翻張先

 

好嘞，係時候捐九洞嘞！

 

呢對湖北男女一馬當先

 

個洞都無咩特別啫

 

反為出返黎個景仲開揚d

 

呢個阿嬸響度賣雞，走地雞14蚊一斤喎

 

佢呢竇雞真係幾靚喎，隻隻都好精神