陪老爺巡視華東(11b)

第十一日 ： 南京 (甘熙故宅、鄭和公園) - 揚州

 

響鄭和公園隔籬食完餐唔多掂o既午餐之後，兩點鐘就上左開去揚州o既汽車，個零鐘就到左揚州車站，轉61號公交車直去到痩西湖邊。未夠四點就到左景區，抬頭一望，又見倒motel 168招牌，唔洗點諗，連隨響度住落，標間148，因為響南京住過呢間連鎖酒店，所以裏面o既設施都熟口熟面。

我地放低行李就落樓下永和來來豆漿食小籠包+咸豆漿當下午茶，之後行下揚州條大街，今日真正開始降溫，又吹起北風，落左樓都要返上去著多件衫。一路行經過食街，睇完一輪，我同夢夢轉左入去間百貨公司，大老爺行呢d地方好快就攰，佢好不容易響二樓搵左張椅坐響度等我地，整下整下都要佢等左成個鐘至走人！臨走仲有個笑話，響萬寧入面我地講廣東話越講越大聲，個服務員妹妹仲以為我地嗌交添！

六點零鐘又係食飯時間，我地卒之揀啱一間飯店，入到去夢夢見有蟹賣兼夾幾抵食，就點都唔肯放過佢地，佢叫左兩隻，d蟹樣雖則麻麻，見佢又食得好滋味喎！其餘食品就好麻麻啫，埋單144，妹妹話收143就得嘞，咁樣好意頭d喎！

天寒地凍，食完飯大家都係早d返去洗衫瞓覺，聽日晨早去遊痩西湖。

 

響鄭和公園側邊呢間飯店食午餐，係碟鹽水鴨過得去咁啦，魚乾就真係好乾咯

 

炒白菜麻麻

 

鱔糊都算可以

 

呢煲蹄筯似唔似豬腸粉呢？

 

上海面

 

坐左個幾鐘車黎到揚州，落車又食下午茶，兩碗鹹豆漿幾別致

 

 

加埋呢幾個包都係11蚊啫

 

食完四圍行，見倒呢棵樹又幾特別喎，成棵樹得翻個樹皮，但係仲仍然枝葉茂盛

 

真係成個樹心都無晒架嘞

 

原來呢棵樹大有來頭，話已經有成千歲，係唐朝時候種落
o既路喎

 

行多一陣就要搵地方食野，今次入左呢間試下，豆付菜湯麻麻咁啦

 

鹽水鴨連下晝果間都不如！

 

玉米炒蝦仁，d蝦仁細粒到要搵放大鏡咁滯

 

黎到揚州，梗要叫碟炒飯應下景，但係普通得很啫

 

獅子頭又唔多掂

 

炒生菜又成碟水

 

夢夢o既至愛--大閘蟹呢度都有

 

但係睇黎品質應該無太湖果d咁正卦！