陪老爺巡視華東(12a)

第十二日 ：揚州 (瘦西湖、个園) – 鎮江

 

舊時D詩人就烟花三月下揚州，我地就天寒地凍黎到揚州，自然就無人地咁多好風景睇啦，但係今日天氣回暖，都唔駛再著咁多衫，心情都好翻d。朝早又係落去樓下來來永和豆漿食早餐，食完就行過去瘦西湖入口售票處，每人90蚊入場費，若果買180蚊聯票可以去多幾個地方，最後我地都係決定淨係玩左呢度先。

瘦西湖門口有好多三輪車伕響度搵生意，佢地建議話每人俾45蚊載我地去遊古城，一場黎到瘦西湖門口，點可以唔入去睇下！所以最後我地都無去坐車仔遊古城。

我地入場呢度叫做卷石洞天，地方唔大，行完呢度要出返收費區過埋馬路再入另外一邊，至正式係瘦西湖，呢便地方大好多，響呢度就正式展開我地o既遊湖之旅嘞。

 

 

揚州古運河好出名，隋煬帝都鍾意響度坐龍船遊覽

 

單係瘦西湖入場費就90蚊一個人，聯票包埋个園、何園、大明寺同埋遊古運河就要180，比起5處逐度買票平75蚊，但係我地未必會去晒咁多度，所以就淨係買單票算嘞

 

買好票就入場，呢度叫做卷石洞天

 

原來呢度地方好細下啫

 

主要o既瘦西湖景區係響另外一面

 

我地響卷石洞天行左一陣，就出黎過馬路黎到呢度再憑票入場

 

呢便氣勢大好多，一入到黎就見四圍都係柳樹

 

菊花圃都好似樣

 

話咁快就黎到二十四景之一o既「長堤春柳」嘞

 

呢度除左有柳有船之外……

 

仲有一群鴨仔等人餵添！隔籬阿閃俾左D面包皮我，拋落去話咁快就無左咯！

 

再行入D就係徐園

 

我地做菠蘿雞聽D導遊講解，個個都好強調話呢個草書園字，話係當時被逼題字呢個文人，專登寫到個園字好似係個虎字俾個圈圍住咁，代表呢個園主徐老虎猛虎入柙咁解喎

 

既然人地都可以捉隻老虎坐監，咁我又何妨打下落水狗先！

 

姑且不論呢D古仔o既真假，呢個園林又係幾靚o既

 

仲四圍有好多呢d菊花盆景添

 

呢隻大鐵鑊唔知要黎點用呢，附近又無導遊講解，想黐都無得黐添！

 

呢d篆書真係好似晝公仔咁，同宜家d小學生寫o既字有幾分相似

 

字就唔識睇嘞，不如睇花啦